Ciwanên Başûr û Rojhilatê Kurdistanê yên di nava wan de komek ciwanên enternasyonalîst ên Fransî jî heyî, serdana çalakgerên mertalên zindî yên li Qendîlê kirin. Ciwanan daxuyanî dan û diyar kirin ku ew ê rê nedin dagirkeriya dewleta Tirk a li ser başûrê Kurdistanê.
Ciwanên Başûr û Rojhilatê Kurdistanê yên di nava wan de komek ciwanên enternasyonalîst ên Fransî jî heyî, serdana çalakgerên mertalên zindî yên li Qendîlê kirin. Çalakgeran diyar kirin ku wê berxwedana Başûrê Kurdistanê û Qendîlê bikevin dîrokê.
Çalakiya mertalên zindî ya li Qendîlê di roja 10’emîn de didome. Ji herçar parçeyên Kurdistanê û Ewropayê ciwan û gel diçin serdana çalakgerên mertalên zindî û serdanên wan didomin.
Piştî gelê Ranya, Qeladizê, welatiyên Rojava, siyasetmedar, pêşmergeyên Dêrîn, hunermedan û Meclîsa Bakur, ciwanên Başûr û Rojhilatê Kurdistanê yên di nava wan de komek ciwanên Fransî yên enternasyonalîst jî heyî serdana çalakgerên mertalên zindî yên li Qendîlê kirin.
Ciwanan daxuyanî dan û diyar kirin ku ji bo rê nedin dagirkeriyê li Qendîlê ne.
Li ser navê Komeleya Ciwanên Welatparêzên Kurdistanê Sîpan Raperîn axivî û diyar kir ku êrîşên dagirkeriyê yên li ser Başûrê Kurdistanê û Rojavayê Kurdistanê berdewam dikin û dixwazin her çar parçeyên Kurdistanê dagir bikin, ji ber wê li Qendîlê ne.
Raperîn wiha got; “Weke ciwanên Başûrê Kurdistanê, heya gefa dagirkeriyê li ser Qendîlê hebe, em jî wê li Qendîlê bîn. Em ê xaka xwe ji dagirkeran re bernedîn. Îro li vir wê gel û gerîla bi hev re berxwedanê bigihîn serketinê.”
Koma ciwanên enternasyonalîst ên Fransî yên ji bo piştgiriya çalakgerên mertalên zindî çûne Qendîlê jî daxuyanî dan. Elîsa Îcha û Matthîs diyar kirin ku li ser navê komên enternasyonalîst ên li welatê wan hatine Başûrê Kurdistanê û Qendîlê û wiha gotin; “Ji bo şermezarkirina rejîma Erdogan a faşîst û li dijî şer derketinê em hatin Qendîlê. Divê hemû kesên xwedî wijdan li dijî şer derkevin. Li kûderê dibe bila bibe, divê piştgiriyê bidin têkoşîna rizgariya gelê Kurd.”
Jinên ciwan ên ji Rojhilatê Kurdistanê û Qendîlê jî daxuyanî dan û banga xwedî derketina li berxwedana Qendîlê kirin.”
