Erdelan Şêx Fatih diyar kir ku dewleta Tirk qanûnên navnetewî, qanûnên cîrantiyê binpê dike û ji hikûmeta Iraqê xwest ku bang li NY bike da ku Konseya Ewlekariya Navnetewî li dijî dagirkeriya Tirk kom bibe û biryar bide.
Hiqûqnas û parêzer Erdelan Şêx Fatîh li ser binpêkirin û êrîşên dewleta Tirk li ser axa Iraqê axivî û got, “3 yasayên ji bo parastina serweriya xaka dewletek heye. Yasaya navdewletî, navxweyî û herêmî. Dagirkeriya dewleta Tirk berevajiyê van her sê qanûnane û serweriya xaka Iraqê binbê dike. Ger bê xwestin Neteweyên Yekbûyî dikare rol bilîze. Divê Hikûmeta Iraq ji bo rawestandina dagirkeriya Tirk daxwazê ji NY bike ku Konseya Ewlekariya Navnetewî kom bibe.
Erdelan di dewama axaftina xwe de îşaret bi qanûnên cîrantiyê jî kir û diyar kir li gorî xala 7 û 8’an a destûra Iraqê dewletên cîran rêz li serweriya hev bigirin û dazanîn ku derbaskirina sînor ya leşkerên Tirk li dijî van xalane. Erdelan destnîşan kir ku hemû rayedarên dewletê li ser parastina xaka Iraqê sond dixwin û got: “Serokkomar, parlamento û Desteya Wezîran sond dixwin ku xaka Iraqê li hember her dijminahiyekî biparêzin. Li gorî vê sondxwarinê pêwîste li hember her êrîşeke li ser serweriya xaka Iraqê bikevin tevgerê.”
Di dawiyê de parêzer Erdelan Şêx Fatih rexne li Serokkomarê Iraqê û cîgirê serokê parlementoya Iraqê ku Kurdin kir û diyar kir ku ew di vê mijarê de erka xwe pêk naynin û axaftina xwe wiha bi dawî kir, “Tirkiye hêzek zêde aniye devera Hewlêr û Behdînanê. Li gorî xala 37 a sala 2003’ê ya Parlamentoya Herêma Kurdistanê, divê ev hêz werin derxistin. Divê kesên ku rê li ber hatina van hêzane vekirine werin dadgeh kirin. Lê, ev biryar ne hate pêk anîn…ROJNEWS
Divê Iraq li hember dagirkeriyê helwest nîşan bide
