Bi sedan kesên ku bi pêşengiya Bereya Niştimanî ya Dijî Dagirkeriyê û KNK’ê çûn Binarê Qendîl, êrîşên dagirkeriyê yên Tirkiyê şermezar kirin û peyamên têkoşînê dan.
Bi armanca şermezarkirina êrîşên dagirkeriyê yên Tirkiyê ku li ser Başûrê Kurdistanê dimeşîne, ji Xaneqîn heya Dihokê bi pêşengiya KNK’ê û Bereya Nîştîmanî ya Dijî Dagirkeriyê bi sedan kesan berê xwe dan Qendîlê.
Ji bajarên Silêmanî, Helepçe, Kerkuk, Hewlêr, Duhok, herêmên Raperîn, Germiyan bi sedan kesên ku di nava wan rêveber û endamên partiyên siyasî, rêxistin û saziyên civakî, her wiha bawermend jî hene, serê sibehê ketin ser riya Qendîlê.
Karwanê çalakvanan di saetên nîvro de gihîşt Binarê Qendîl û çû serdana çadira Mertalên Zindî ku ji 8’ê Hezîranê ve hatiye vedan.
Girseya gel li vir piştî ku ji aliyê Mertalên Zindî ve hat pêşwazîkirin, daxuyaniyek da çapemeniyê. Daxuyaniya ku hat dayîn de êrîşên dewleta Tirk hatin şermezar kirin.
Nûnerên saziyan bang li gelê Kurdistanê û hemû hêzên siyasî yên Kurdistanê kirin ku li dijî dagirkeriyê helwestê nîşan bidin.
Eniya Netewî li Qendîlê peyam da
