Dilîn EHMED/Ronahî-Qamişlo
Dema gelek dest bi şoreşekê dike berî her tiştî zimanê dayîkê pêş dixe. Lewre ziman hebûna civakê ye û bi ziman mafên xwe yên jiyanê distînin. Li hemberî daxwaziya ENKS`ê ya vegera minhaca perwerdeyê ya hikumeta Şamê, li dibistanên bakur û rojhilatê Sûriyê, gelê herêmê nerazîbûna xwe nîşan da.
Şêniya ji taxa Hilêliyê ya bajarê Qamişlo Celîla Hisên, li ser vê mijarê ji rojnameya me re wiha axivî: “Em û zarokên xwe bi zimanê Kurdî pir kêfxweş in. Berî şoreşa Rojava dema zarokên me diçûn dibistananên rejimê em ne aram bûn. Lewre zimanê erebî li ser wan giran bû. Bi destpêkirina şoreşê re, ziman pêş ket û li ser rûyên zarokan jî kêfxweşiyê xuya kir. Eger zimanê civakê ne zimanê dayîkê be wê demê hebûna wê jî nîne. Ji milê agahî û pêşxistina zarokan ve, minhaca Rêveberiya Xweser ji her alî ve dagirtî ye.”
Celîla Hisên axaftina xwe wiha qedand: “Piştî ewqas keda mamosteyên me û rijandina xwîna bi hezarên şehîdan, ENKS bi hêsanî dibêje, em vî zimanî nepejirînin. Em jî vê daxweziya wan qet napejirînin. Eger em li zimanê dayîka xwe xwedî dernekevin, ti kes lê xwedî dernakeve. ”
CIVAK BI ZIMANÊ DAYÎKÊ ÇAND Û HUNERA XWE PÊŞ DIXE
Xwendekara refa nehan ya bi navê Sonya Hemê Necar jî nerîna xwe wiha anî ziman: “Ev çend sal in em xwe fêrî zimanê xwe dikin û em ji zimanê xwe pir hes dikin. Ji ber ku em çend salan fêrî zimanî erebî bûbûn, destpêkê me zehmet didît lê niha bi hêsanî em fêrî her tiştî dibin. Em bi zimanê xwe kêfxweş in. Divê em biparêzin û pêş bixin. Hin kes dibêjin di minhacê kurdî de agahî kêm in, lê ne rast e.”
PIŞTÎ BICÎKIRINA XEWN Û XEYALÊN ME, ŞERM E EM LI HEMBERÎ ZIMANÊ XWE DERKEVIN
Li ser heman mijarê welatiyê bi navê Ebdulhemîd Elî yê 64 salî jî wiha axivî: “Ev cara yekê ye em dibihîzin ku hin li hemberî zimanê xwe derdikevin. Di demê berê de me nikarîbû bi hêsanî bi zimanê xwe biaxivin. Niha piştî vê derfeta zêrîn em li hemberî zimanê xwe derkevin, şerm e. Yê ku gelan ji hev cuda dike û civakê pêş dixe ziman e.”
Ebdulhemîd Elî axaftina xwe wiha qedand: “Daxwaziya me ew e ku gelê me bi planên dijmin neyê xapandin û li zimanê xwe xwedî derkeve. Lewre zimanê me hebûna me ye.”