PYD‘ê destdirêjiya li ser Başûrê Kurdistanê wekî destdirêjiya li ser tevahî gelê Iraq û Kurdistanê bi navê kir û bang li partiyên Kurd kir ku demildest kongreya netewî ya Kurdistanê li dar bixin.
Partiya Yekîtiya Demokraîtk PYD’ê têkildarî gefên dagirkeriya Tirkiyê yên li dijî Başûrê Kurdistanê daxuyanî da û bang li tevahî partiyên Kurdistanî kir ku demildest Kongreya Netewî ya Kurdistanê li dar bixin.
Daxuyanî wiha ye:
Êrîşên Tirkiyê li dijî Başûrê Kurdistanê û israra rêjîma Tirkiyê ya mayîna li wan herêman binpêkirineka serweriya xaka welatekî din û binpêkirina qanûnên navnetewî ye.
Tirkiye bi pergala xwe û siyasetên xwe yên qirkirin û inkarkirina gelê Kurd bingeha hemû krîzên Rojhilata Navîn e. Di heman demê de ew bi xwe jî di qeyranekê de ye û nikare derbas bike. Aloziya siyasî û rewşa awarte ketiye sala xwe ya 3‘yemîn de. Dewleta Tirkiyê ji hemû beşên civakî, jin û ciwan, akademisyen, leşker, dadwer, mamoste, rojnamevan, hiqûqnas girtine. Yên ku li dijî fermanên wan derdikevin weke teror tên bi nav kirin. Bi rastî Tirkiye veguherî ye girtîgeheke mezin. Şansê mayîna hikumeta AKP’ê li ser desthilatiyê pir kêm e.
Erdogan bi kuştin û rûxandinê, bi hêncetên ne di cih de dixwaze xewna xwe ya dagirkirina Başûrê Kurdistanê bi cih bîne, bala gelê Tirkiyê ji krîza hundirîn bikşîne ser derve û serkeftina xwe ya di hilbijartinên 24‘ê Hezîranê misoger bike. Heger niha çavê wê li Başûrê Kurdistanê ye paşê dê berê xwe bide herêmên Iraqê.
Wekî Meclîsa Giştî ya PYD‘ê em dijminahiya dagirkeriya Tirkiyê li Başûrê Kurdistanê şermezar dikin û wekî dijminahiyeke li ser tevahî Iraq û Kurdistanê dibînin. Mebesta Tirkiyê ne tenê Qendîle lê belê dagirkirina Zaxo, Hewlerê, Şengal û Nînowa ye jî.
Em bang li civaka navdewletî, Neteweyên Yekbûyî, Konseya Ewlekariyê dikin li hemberî zêdegaviyên Tirkiyê erka xwe bi cih bînin.
Em bang li tevahî partiyên Kurd û Kurdistanî yên li Sûriyê, Iraq, Tikriyê û Îranê dikin ku ji bo lidarxistina kongreya Netewî ya Kurdistanê bixebitin. Lidarxistina kongreyê êdî pêwîstiyeke.
Em bang li hemû hêz, partiyên niştimanî û demokratîk ên Iraq û Sûriyê dikin ku li hemberî dagirkeriya Tirkiyê bisekinin.”
Êrîş li ser tevahî Kurdistanê ye
