Bi hezaran welatiyên Efrînê, bi armanca şermezarkirina dagirkeriya Tirk ya li dijî Efrînê û bêdengiya navneteweyî ya li hemberî dagirkirina Efrînê, li kantona Şehbayê meşek girseyî lidarxistin.
Bi hezaran welatiyên Efrînê yên ji cih û warên xwe koç kirin û li Şehba bi cih bûne, bi armanca dagirkeriya li ser Efrînê şermezar bike meşek girseyî pêk anî. Çalakî bi dirûşma “Ji bêdengiya cîhanê re na, serkeftin a gelê Efrînê ye” pêk hat. Di meşê de bi hezaran welatiyên Efrîniyên yên li kampên kantona Şehbayê bicih bûne amade bûn. Welatiyên ku li ber Navenda Heyva Sor a Kurd dest bi meşê kirin, ber bi Qada Ehrezê ve çûn. Di meşê de welatiyan dirûşmên ‘Bijî berxwedana serdemê’ û ‘Bijî Serok Apo’ berz kirin.
‘BÊDENGIYA CÎHANÊ ŞERMEZAR KIRIN’
Meşa efrîniyan li Qada Ehrezê veguherî mîtîngê. Li ser navê girseyê endama Meclisa Kantona Şehbayê Henan Osman daxuyanî xwend. Osman, dagirkeriya Tirk şermezar kir. Osman, bêdengiya qada navneteweyî ya li hemberî dagirkirina Efrînê jî bi tundî şermezar kir û xwest Tirkiye dest ji dagirkirinê berde. Osman herî dawî wiha got: “Dê tu hêz nikaribe têkoşîna gelê kurd bişkîne û vîna gelê kurd teslîm bigire.”
Li ser navê Kongreya Star jî Emîne Dîngîlî axivî û diyar kir ku Erdogan û hevkarên wî wê tu carî nikarin gelê kurd ji hev qut bikin û wan têk bibin. Meşa li dijî dagirkeriyê bi dirûşmên “Bijî berxwedana gelê kurd”, “Bijî berxwedana Efrînê” û “Bijî Serok Apo” bi dawî bû.
