Meclîsa Leşkerî ya Babê bi daxuyaniyekê derbarê kiryarên dewelta Tirk yên li Babê û bang li civaka navnetewî kir zextê li Tirkiyê bikin da ku ji Babê û Bakurê Sûriyê derkeve û koçber vegerin warê xwe.
Daxuyaniya Meclîsa Leşkerî ya Babê li bajaroka Erîma ya girêdayî Babê ji aliyê Fermandarê Giştî yê Meclîsê Cemal Ebû Cûma ve hat xwendin.
Di daxuyaniyê de hat gotin; ˝Aloziya li bajarê Babê û tevahiya Sûriyê dewam dike. Gelê me rastî zilma dewleta Tirk û çeteyên girêdayî wê tê. Em weke Meclîsa Leşkerî ya Babê careke din hebûna hêzên Tirkiyê li bajar û gundên me û Sûriyê şermezar dikin û weke dagirkerî pênase dikin.
Ev bûye du sal Tirkiyê û çeteyên girêdayî wê bajarê me Bab dagir kirine. Piştî ku bajarê me dagirkirin, mal û mulkên şêniyên herêmê didizin, gel digrin û destûr nadin ku gel vegere bajarên xwe.
Herî dawiyê artêşa Tirk û komên çete li nexweşxaneya El-Hikme êrîşî karmend û hemşîreyên nexweşxanê kiribûn. Girtîgehên Tirkiyê yên li Babê niha ji gelê bêsûc tijî bûne. Ji ber ku li Babê jiyaneke aram û bi ewle nemaye şêniyên bajarê Babê û gundewarên wê neçar dimînin ku koçber bibin. Tirkiye li gel polîtîka tirkirina şêniyên herêmê destê xwe datîne ser malên şêniyan û weke navendên leşkerî ji xwe re bikartînin.
Em bang li civaka navnetewî dikin ku destwerdana Tirkiyê bikin û zextê lê bikin ku xwe ji Babê û Bakurê Sûriyê vekşîne.
Bila dewleta Tirk ji Babê derkeve
