Demîrtaş bersiv da derewên Erdogan

Namzetê HDP’ê yê Serokkomariyê Selaheddîn Demîrtaş bersiv da derewên Erdogan ên li ser bûyerên 6-8’ê Cotmehê yên ji bo Kobanê.
Demîrtaş ji Erdogan re got, “Eger tu fermana min a ji bo kuştina 53 kesî îsbat bike, soz ez ê xwe ji namzetiya Serokkomariyê vekişînim.”
Demîrtaş bi rêya parêzerên xwe, di hesabê xwe yê Twitterê de bi sernavê “Derewên Erdogan ên li ser Kobanê” peyam weşand. Peyamên Demîrtaş wiha ne:
“Ji kerema xwe bi baldarî bixwînin û bibînin bê li hemberî me zîhniyeteke çawa heye. Dema destpêkirina provokasyon û şîdeta di xwepêşandanên Kobanê de, 5-6’ê Cotmehê nîne. Dema destpêkirina wan, 7’ê Cotmehê û piştî wê ye ku Erdogan wê rojê got, ‘Kobanê li ber ketinê ye’. Piştî vê daxuyaniyê mirovan jiyana xwe ji dest dan. Der barê min û rêveberiya HDP’ê de ji ber bûyerên Kobanê dozeke bi tenê jî nehatiye vekirin. Hejmara mirovên di bûyerên Kobanê de hatine kuştin 53 nîne, hejmar 43 ye. 6 jê ji HUDAPAR’ê ye, 2 wezîfedarên ewlekariyê ne ku bi sûîqestê hatin kuştin, 2 jê penaberên ji Sûriyê ne, 33 jê HDP’yî ne. Ji bilî 6 endamên HUDAPAR’ê, li ser kuştina mirovên din doz û lêpirsîneke xurt nehatiye vekirin. Bûyerên Kobanê, berevajî îdîayên Erdogan piştî hilbijartina 7’ê Hezîrana 2015’an neqewimîne. 8 mehan berî hilbijartinê, yanî 7’ê Cotmeha 2014’an qewimîne. Piştî bûyerên Kobanê 5 mehên din jî di navbera me û Erdogan-AKP’ê de ji bo pêvajoya çareseriyê hevdîtinan dewam kirin. Yanî Erdogan ku îro me weke ‘terorîst’ nîşan dide, 5 mehan piştî bûyeran jî bi me re hevdîtin kir. Ji bo provokator û hêzên ku rê li ber bûyerên Kobanê vekirine eşkere bibin, me 12 caran pêşnûmeya pirs û lêkolînê dan Meclîsê, lê ji aliyê AKP’yiyan ve hatin redkirin. Ya ku Erdogan pê diêşe, kuştina welatiyên me bi rengekî hovane nîne. Ya ku Erdogan gelekî pê diêşe, têkçûna DAÎŞ’ê li Kobanê ye.