Parlamenterê HDP’ê yê Çewligê û namzetê Amedê Hişyar Ozsoy li Çewligê di dema fitarê de peyivî û diyar kir, karê ku wan 7’ê Hezîranê dest pê kirin wê 24’ê Hezîranê biqedînin.
Partiya Demokratîk a Gelan HDP bi rengekî berfireh li Çewligê dixebite. Namzetên HDP’ê yên Çewligê Erdal Aydemîr, Nîhat Aksoy, Şefîka Dogan û rêxistinên bajar û navçeyên Solxan, Kanîreşê û Dara Hênê bê navber dixebitin. Bi wesîleya meha Remezanê li Yeşîl Vadî ya li navenda Çewligê xwarina fitarê hate dayin. Alîkara Hevserokên DBP’ê Hacer Ozdemîr, Parlamenterê Çewligê yê HDP’yî û namzetê Amedê Hişyar Ozsoy û bi dehan kes tevlî merasîmê bûn.
Hişyar Ozsoy bal kişand ser tirsa Serokê Giştî yê AKP’ê Tayyîp Erdogan a ji Demîrtaş û got, “Bi hilweşandina hiqûqê re Demîrtaş dîl girt, lê hê jî jê ditirse. Hewl dide Demîrtaş nebaş nîşan bide. Xuya ye Demîrtaş li nava çar dîwaran jî wî bêzar dike. Erdogan ê çûyinê ye, lewma ne li ser hişê xwe ye.”
Ozsoy destnîşan kir, wê karê ku 7’ê Hezîranê dest pê kir û nîv hişt, 24’ê Hezîranê biqedînin. Ozsoy bal kişand ser Îdrîs Balûken jî ku 9 sal cezayê girtîgehê lê hatiye birîn û got, “Îdrîs wê ji girtîgehê derkeve û siyasetê bike. Lê belê cihê Erdogan di paşeroja Tirkiyê de nîne.”
Ozsoy li ser ewlekariya sindoqan jî hin hişyarî kir û bang li gelê Çewligê kir ku di hilbijartinên 24’ê Hezîranê de bi erk û berpirsyariya xwe rabe.
Erogan wê here, lewma ne li ser hişê xwe ye
