Artêşa Tirk êrîşî Girê Spî kir

Şevê 7’ê Hezîranê deriyê sînor ê Girê Spî rastî êrîşeke bi çekên giran ji aliyê artêşa Tirkiyê ve hat.
Artêşa dagirker a Tirk ji nuqteyên xwe yên sînor bi şev saet di 23:00’an de bi çekên giran êrîşî deriyê sînor ê Girê Spî kir. Êrîşa artêşa Tirk heta derengiya şevê dom kir.
Li gor nûçegîhanên ANHA’yê di encama êrîşa artêşa Tirk de tenê ziyanên madî çêbûne.
Girêdayî mijarê şervanê Hêzên Erka Xweparastinê Elî Îbrahîm diyar kir ku ew di dema êrîşê de li devera deriyê sînor dima û wiha got: “Artêşa Tirk bê navber devera deriyê sînor bi çekên giran heta derengiya şevê armanc girt.”
Elî Îbrahîm got ku wan ti bersiva êrîşan nedane û tenê guleyekî jî bi aliyê Tirkiyê ve neavêtine.
Girêdayî heman mijarê welatiyê bi navê Seîd El-Fehil ku mala wî li devera deriyê sînor e diyar kur ku artêşa Tirk hewl dide tirs û xofê bixe dilê welatiyan da ku neçarî koçberiyê bike û wiha got, “Em ti carî dest ji malên xwe bernadin. Hovîtiya Tirkiyê israra me di mayîna di bajêr de zêde dike.”…ANHA