Erdogan li têkçûna xwe mikur hat

Berdevkê HDP’ê Ayhan Bîlgen li navenda giştî ya partiya xwe civîneke çapemeniyê li dar xist û mijarên di rojevê de nirxand.
Berdevkê Partiya Demokratîk a Gelan (HDP) Ayhan Bîlgen diyar kir ku ji 28’ê Nîsanê û vir ve di operasyonên dijî HDP’ê de 136 kes hatine destgîrkirin û 14 jê hatine girtin.
Bîlgen işaret bi serdana Erdogan a ku 3’yê Hezîranê li Amedê kir û got, “Rastî berevajî kir û bi vî rengî axivî. Hilbijartin sala 2015’an hate kirin, lê Serokkomar got, ‘Dengên ji HDP’ê re hatin dayin kir ku gewî bibin û HDP’ê gel daxist kolanan’. Nepêkane ku yek bi dengê sala 2015’an rabe mirovan sala 2014’an daxîne kolanan. Teknolojiyeke bi vî rengî hê neafiriye. Dibêje ku me li Amedê ‘kûleya saetê’ xera kirine. Halbûkî li Amedê kûleya saetê nîne. Amedî hemû bi vê rastiyê zanin, lê xuya ye yên ku li wê qadê ew pêşwazî kirin ti ji wan ji Amedê ye, lewma her kesî li ber van gotinên wî jê re li çepikan xist.”
Bîlgen diyar kir ku rojeva bingehîn a vê hilbijartinê, hiştina HDP’ê li binê bendê ye û wiha dewam kir: “Hem benda ji sedî 10’an ranake, hem jî hewl dide HDP’ê di binê bendê de bihêle û bi vî rengî serketina xwe ragihîne. Bêguman ev yek pirsgirêkeke exlaqa siyasî ye. Dengdêr kê biecibîne wê dengê xwe bide wê partiyê. Eger bend tenê li dijî HDP’ê nayê rakirin û tevî vê yekê bi her awayî zext û zordarî li HDP’ê tê kirin, hingî dengdêrên deng didin AKP’ê jî dikarin vê rewşê binirxînin.
Serokkomar îdîa kir ku pirsgirêka Kurd qediya ye. Bi îdîa û soza çareserkirina pirsgirêka Kurd bi rê ket, lê bêyî ku tiştekî bike niha radibe dibêje ‘pirsgirêka Kurd qediya ye’. Ev yek mikurhatina li têkçûna desthilatdariyê ye.
Di ser çalakiyên Kobanê re gefê li partiya me û namzetê me Demîrtaş dixwe… Me 11 caran pêşniyar kir ku ji bo lêkolînkirina bûyerên Kobanê li Meclîsê komîsyon were avakirin. Lê pêşniyara me her carê bi dengên AKP’ê hate redkirin. Hûn naxwazin bê lêkolînkiri, naxwazin rastî eşkere bibin û radibin partiya me dikin hedef.
Em mirina kesî qebûl nakin. Em dixwazin hemû kiryar bên dîtin. Lê belê hinek radibin cihêkariyê dixin navbera mirina mirovan. Di gilînameya me hemûyan de tespîteke zelal heye. Derbarê mirina 5-6 kesî de dadgerî li ser kar e. Lê belê ne li ser wezîfedarên emniyetê yên li Çewligê mirin, ne jî li ser endamên partiya me yên mirin, dadgerî tiştekî nake. Ev yek bi xwe jî nîşan dide bê di kîjan astê de operasyoneke xapandinê heye.”