Êzidiyên Efrînê yên li kampa Serdemê gotin, “Em dagirkeriya Tirkiyê qebûl nakin. Ji ber ku diz in, mal û milkên me talan dikin, jin û zilamên me direvînin, gorên me yên pîroz dirûxînin.”
Hejmarek Êzidiyên Efrînê yên li kampa Serdemê nerazîbûnên xwe nîşanî kirinên ku li Efrînê ji aliyê leşkerên artêşa Tirk a dagirker û çeteyên girêdayî wê ve têne kirin, dan.
Ebdo Xalo ji gundê Kefer Zeyt derbarê mijarê de got, “Em ji Efrîn derketin da ku ol û rûmeta xwe ji hovîtiya dagirkeriya Tirkiyê û çeteyên girêdayî wê biparêzin. Ji ber tirbên me yên pîroz xirab dikin, bi navê Islamê milkên me talan dikin, kirinên wan di tu baweriyan de nayê qebûlkirin.”
Ebdo, anî ziman ku çeteyên dewleta Tirk welatiyên li Efrînê yên nedikarîn ji Efrînê derkevin neçar dikin ku dev ji baweriya xwe berdin û bibin misilman, destmalan li ser jinan feriz dikin û her kesî neçar dikin ku rojî bigirin û nimêjê bikin. Ebdo Xalo got, “kes van qanûnan pêk neyne pereyan ji wan dixwaze, armanca wan qirkirina baweriyan e.”
Welatiya bi navê Qudret Betal êrîşên dewleta Tirk a dagirker li ser Efrînê bi bîr xist û wiha got, “Li Efrînê tiştek ji hovîtiya çeteyan xilas nebû, em neçar man ji Efrînê derkevin ji bo çeteyên Tirkiyê mîna kiryarên li Şengalê li dijî me dûbare nekin, pîrozgehên me xirab dikin û me weke kafîr nîşan didin.”
Kamîran Xalo jî destnîşan kir ku ew dagirkeriya Tirkiyê qebûl nakin û wiha domand, “Dagirkeriya Tirkiyê û çeteyên wê, li pêşberî civaka navdewletî bi çekên qedexekirî em bomebebaran kirin. Di rojên munasebet û şahiyan de em diçûn goran li gundê Feqîra yê navçeya Cindirêsê û yên li gundê Qestel Cindo yê navçeya Şera. Lê çeteyên dagirkeriya Tirkiyê ew dever xirab kirin.”
Kamîran Xalo, bang li civaka navdewletî û rêxistinên hiqûqî kir ku girantiya vegera welatiyên Efrînê bide…ANHA
Êzidî dagirkeriyê qebûl nakin
