Ronahî Sadûn/Qamişlo
Yekîtiya Ragihandina Jin (YRJ) bi boneya salvegera 6’emîn a damezrandina xwe daxuyaniyek da û bi vê boneyê wê bi serfirazî xebat û têkoşîna rojnamevanên jin a di rêya parastina heqîqetê de meşandine, bi bîr anî. Herwiha wê tekez kir ku hîna astengî pêşberî jin di qada çapemeniyê de tên, lê tevî wê jinên rojnamevan ên Sûriyeyî peyama xwe ya pîşeyî û mirovî pêk anîn.
Yekîtiya Ragihandina Jin YRJ’ê bi daxuyaniyekê salvegera damezrandina xwe ya 6’emîn bi bîr anî û soza berdewamkirina xebatên xwe yê di rêya rastiyê de dûbare kir. Daxuyaniya YRJ’ê wiha bû:
‘Em bi rola jinan di avakirina çapemeniyeke azad, pîşeyî û demokratîk de bawer in’
Daxuyanî wiha hat destpêkirin: “Di salvegera 6‘emîn a damezrandina Yekîtiya Ragihandina Jin li Bakur û Rojhilatê Sûriyê (YRJ) de, em bi serfirazî xebat û têkoşîna rojnamevanên jin a di rêya parastina heqîqetê de meşandine, bi bîr tînin. Em bi rola jinan di avakirina çapemeniyeke azad, pîşeyî û demokratîk de bawer in ku hêviyên civakan ên azadî, edalet û wekheviyê nîşan dide. Ev bone li gel arîşeyên zêde yên li pêşberî rojnamevanên jin li herêma Rojhilata Navîn derdikevin, hatiye. Hîna jin di qada çapemeniyê de rû bi rûyî hemû cûreyên astengkirin, binpêkirin û êrişên rasterast ên di dema şopandina şeran de, reşkirin, tundiya dijîtal û cudekariya pêşeyî ne. Zêdetirî vê yekê qeyd û zext li ser azadiya derbirînê û karê rojnamegeriyê tên kirin. Jinên rojnamevan ên li herêmê tevî hemû zehmetiyan, hêza xwe ya şikandina bendan û ragihandina dengê civakên xwe û dozên jinan ji bo raya giştî ya herêmî û navneteweyî îsbat kir.”
‘Rojnamevanên jin berdêlên giranbuha dan’
Daxuyanî wiha domand: “Li Sûriyê rojnamevanên jin li gel binpêkirin û kiryarên komên çekdar ên cuda û artêşa Tirk û DAIŞ’ê de berdêlên giranbuha dan. Di encama van kiryaran de gelek rojnamevanan di dema şerên domdar de jiyana xwe ji dest dan. Herwiha gelek hatin girtin, koçberkirin û gef li wan hatin xwarin û rasterast hatin hedefkirin. Ev yek jîngeheke herî xeternak a xebata rojnamegeriyê nîşan dide. Lê tevî van hemûyan jî jinên rojnamevan ên Sûriyeyî peyama xwe ya pîşeyî û mirovî pêk anîn û piştrast kirin ku çapemeniya azad yek ji amûrên herî girîng ên parastina mafên mirovan û aşkerakirina rastiyan e. Li Bakur û Rojhilatê Sûriyê, rojnamevanên jin nimûneyek bêhempa ya ragihandina berpirsyar û girêdayî dozên civakê û jinan pêşkêş kirin. Li vir jinên rojnamevan li pêş bûn, berdêl dan, bûyer, guhertin û veguhertinên siyasî, civakî û mirovî ragihand. Di heman demê de çanda diyalogê, pirrengî û jiyana hevebeş xurt kirin.”
Di daxuyaniyê de YRJ’ê soza xwe ya parastina azadiya ragihandinê û mafên rojnamevanên jin û xebata li ser xurtkirina hebûna jinan di saziyên ragihandinê de, peydakirina hawîrdoreke ewle û piştgir ji bo rojnamegerên jin nû kir û wiha bû: “Em Yekîtiya Ragihandina Jin bi taybetî silav û hezkirinên xwe ji jinên rojnamevan ên ku bûyer û geşedanên operasyona entegrasyonê, lihevkirinên siyasî yên piştî peymana 29’ê Çileyê şopandin, dişînin. Van rojnamevanan tevî mercên zehmet ên xebatê û riskên ewlehî û pîşeyî jî, lê asteke bilind a pîşeyî û pabendîbûnê nîşan dan. Bi berpirsyarî bûyer ragihand û wêneyeke objektîf a guhertinên heyî nîşan dan. Yekîtiya Ragihandin Jin a Bakur û Rojhilatê Sûriyê di wextekî de ku salvegera damezrandina xwe pîroz dike, soza xwe ya parastina azadiya ragihandinê û mafên rojnamevanên jin û xebata li ser xurtkirina hebûna jinan di saziyên ragihandinê de, peydakirina hawîrdoreke ewle û piştgir ji bo rojnamegerên jin nû dike, da ku bikarin peyama xwe ya pîşeyî dûrî zimanê gefxwarin û cudakariyê pêk bînin.”
‘Ragihandina jinên azad bingeha avakirina civakeke demokratîk, wekhev û dadperwer e’
Daxuyanî wiha bidawî bû: “Em bang li dezgehên ragihandinê, saziyên hiqûqî yên herêmî û naveteweyî dikin ku xebatên parastina jinên rojnamevan zêde bikin, hesab ji binpêkeran bipirsin û mafên jinan misoger bikin, da ku xwe bigihînin agahiyan û bi awayekî çalak beşdarî avakirina xîtaba ragihandinê bibin. Bi vê wesîleyê em hemû rojnamevanên jin ên ku di mercên herî zehmet de gotin û pênûsa azad rakirin, silav dikin. Herwiha em hemû kesên ku bawer dikin ku ragihandina jinên azad bingeha avakirina civakeke demokratîk, wekhev û dadperwer e, silav dikin. Bijî gotina azad… Silav ji hemû rojnamevanên têkoşer ên ji bo heqîqet û aştiyê re.”
