Ayşa Silêman/ Dêrik
Rêveberê Navenda Trafîkê ya bajarê Girkê Legê Rêzan Ehmed diyar kir ku her mirovekî ku zagonên tirafîkê bin pê dike jiyana xwe û ya derdora xwe dike xeteriyê. Ehmed tekez kir ku ewê di demên pêş de biryara qedexekirina motoran bi cih bînin.
Li seranserî Rojavayê Kurdistanê qezayên tirafîkê zêdebûne, bi taybet li bajarê Girkê Legê û gundewarên girêdayî wê ku di vê mehê de 25 qezayên tirafîkê rûdane û 12 ji wan qezayan bi rêya matoran bûn, ev yek jî xeteriyekê li ser jiyana ajokar û welatiyan çêdike.
Di derbarî qezayên tirafîkê yên ku rû didin û biryara qedexekirina matoran, rêveberê Navenda Trafîkê ya bajarê Girkê Legê Rêzan Ehmed ji Rojnameya me re axivî.
‘Binpêkirina zagonan dibe sedema qezayan’
Rêzan Ehmed anî ziman ku karê tirafîkê rêxistinkirina cûnûhatinê ye û wiha got: “Rojane tîmên tirafîkê derdikevin nava bajêr da ku rê li ber qezayan bigirin û erebeyan bi rêk û pêk bikin. Ji bilî di hundirê bajêr de tîmên me li derveyî bajêr jî disekinin. Di milê ewlehiyê de têkiliya me bi Asayîş û polîsên leşkerî re jî heye, di heman demê de têkiliya me bi saziyên mîna şaredarî, meclis û navenda çûnûhatinê jî re heye. Karê me di vê dema dawî de girantir bûye ji ber ku şaredarî dest bi karê zivitkirina riyan kiriye û tîmên me jî di xizmetê de ne da ku rê bi dispilîn bikin û astengî ji gel û ji şaredariyê re çênebe. Li kêlek vê yekê tê dîtin ku qezayên tirafîkê zêde bûne ev yek encama binpêkirina zagonên tirafîkê ne ku gelek ajokar hene temenê wan hîn negihiştiye 18 salî û bi awayekî lez erebeya diajonin, ew him zirarê dighînin xwe him jî ajokarê pêşberî xwe. Herwiha gelek kes hene dema erebeyan diajonin li derdora xwe nanerin û bilez rê qut dikin ev yek jî dibe sedema qezayên tirafîkê.”
‘Biryara qedexekirina matoran wê didemê pêş de pêk were’
Rêveberê Navenda Trafîkê ya bajarê Girkê Legê Rêzan Ehmed axaftina xwe wiha qedandin: “Gelek kes hene li ser riyên giştî diçin û bi telefonê mijûl dibin, hişê wan ne li rê ye û zagonên trafîkê jî binpê dikin, di encama vê xemsariyê de gelek kesan jiyana xwe ji dest dan. Herwiha ji parêzgeha Hesekê biryara qedexekirina matoran derket di bajêr de û ji derveyî bajêr, ev biryar derket ji ber ku piraniya kesên ku matoran diajonin temenê wan di bin 18 salî re ye û gelek caran matoran bi awayekî şaş û xeternak bikar tînin, ev yek jî dibe sedema qezayên Tirafîkê. Li aliyekî din bi rêya matoran gelek dizî çêdibin, gel jî gilî dikin ji ber dengê motoran û ji ber ku ew dibin sedema neramîbûnê. Heya niha me biryar pêk neaniye di, demên pêş de wê biryara qedexekirina motoran pêk were û sîstema pêkanîna wê hîn ne diyare, ji ber ku gelek endamên saziyan malên wan jiderveyî bajêrin û bi riya matoran diçin û tên lewma ji bo wan helbet wê çareseriyek hebe. Em bi hêvîne gel jî amade be ji bo vê biryarê û bi me re bibin alîkar ji ber ku ev erkê me ye lewma em neçarin vê biryarê pêk bînin.”
