Bêrîtan Xalid
Jina Kurd di dîrokê de ne tenê wek dayik an jî mamosteyê civakê hatiye nasîn, lê her dem di demên zehmet de rolek parastinê jî girtiye. Ji berxwedanên dîrokî heta sîstemên nûjen ên xweparastinê, jina Kurd bûye sembola hêz, azadî û parastina civakê.
Hêza Parastina Jin, ango YPJ’ê ji sala 2013’an ve bûye yek ji sembolên girîng ên têkoşîna jinan li Bakur û Rojhilatê Sûriyê. YPJ’ê ne tenê hêzeke leşkerî ye, lê her wiha temsîla îradeya jinan, azadî û beşdarbûna wan di hemû warên jiyanê de dike. Di salên şerê li dijî DAIŞ’ê de, şervanên YPJ’ê roleke girîng lîstin û navê wan li ser asta cîhanê hate nasîn. Îro, bi guherînên siyasî û leşkerî yên li Sûriyê, mijara entegrasyona hêzên leşkerî bûye yek ji mijarên ku gelek tê gotûbêjkirin. Di vê çarçoveyê de, gelek aliyên civakê dibêjin ku YPJ’ê ne tenê hêzeke leşkerî ye, lê her wiha destkeftiyeke girîng a jinan e ku di salan de bi fedakarî hatî ava kirin. Ji ber vê yekê, gelek jin û rêxistinên jinan balê dikişînin ser parastina hebûna YPJ’ê û rola wê di pêşerojê de.
Piştgiriya ku ji bo YPJ’ê tê nîşandan jî tenê ji aliyê şervanan ve nayê. Li gelek deveran, rêxistinên jinan, çalakvanên civakî û kesayetiyên siyasî dibêjin ku hebûna YPJ’ê garantiya beşdarbûna jinan di warê ewlehiyê û biryargirtinê de ye. Li gorî wan, her çareseriyek ku ji bo pêşeroja Sûriyê tê lêgerîn, divê cihê jinan û destkeftiyên wan jî di nav de were parastin.
Di heman demê de, gelek kes bawer dikin ku têkoşîna YPJ’ê di salên borî de derfeteke mezin çêkir ku jin di gelek waran de xwe bidin nîşandan û rola xwe ya çalak li civakê zêde bikin. Ji ber vê yekê, nîqaşên niha yên derbarê entegrasyonê de ne tenê nîqaşên leşkerî ne, lê her wiha bi maf, temsîl û destkeftiyên jinan ve girêdayî ne.Di encamê de, YPJ îro ji bo gelek jinan sembola berxwedan, azadî û xwebirêvebirinê ye. Her çiqas rewşa siyasî û leşkerî diguhere jî, gelek aliyan dibêjin ku divê rola jinan û destkeftiyên ku di salên borî de hatine bidestxistin bên parastin û di pêşerojê de jî bên xurtkirin. Ev jî dibe sedem ku nav û rola YPJ’ê hîn jî di nava gotûbêjên girîng ên li ser pêşeroja Sûriyê de cihê xwe biparêze.Hebûna YPJ’ê îspat kir ku jin dikarin rola herî çalak di jiyana civakî û siyasî de bilîzin, bi vî awayî rola jinê ji çarçoveya kevneşopî derxist û ew kir biryarder di civakê de.Rola YPJ’ê di têkoşînê de ew veguherandiye çavkaniyek mezin a îlhama ji bo tevahî jinên cîhanê û jinên Rojhilata Navîn bi giştî.
Dîroka jina kurd dîroka tenê berxwedanê nîne, dîroka parastina nasname, ziman û civakê ye, ji ber vê îro jin di her cihekî de xwedî rol û misyone , vê hişt ku ji tevahî cîhanê re bibe nimûne û her kes ji vê tecrûbeyê fêde bigre .
