Ayşa Silêman/ Dêrik
Partiya Yekîtiya Demokrat PYD‘ê ya bajarê Dêrikê derbarê diyarkirina endamên parlamentoyê û kêmkirina kursiyan ji bo gelê Kurd daxuyaniyek da.
Partiya Yekîtiya Demokrat PYD’ê ya bajarê Dêrikê li pêşiya Meclisa Malbatên Şehîdan derbarê diyarkirina endamên parlamentoyê û kêmkirina kursiyan ji bo gelê kurd yên ku duh hatibûn lidarxistin, daxuyaniyek da. Di daxuyaniyê de hemû endam û rêveberên saziyan amade bûn.
Di destpêka daxuyaniyê de bal hat kişandin ku ev bi salaye gelê Sûriyê bi hemû cihêrengiya xwe di bin zordariyê, dûrxistina siyasî û cudakariya etnîkî û îdeolojîk de jiyaye û wiha hate ziman: “Beşên mezin ên nifûsa Sûriyê ji mafê xwe yê xwezayî ye beşdarbûna rastîn di rêvebirina welêt û girtina biryaran de bêpar man. Civaka Kurd di nav komên ku herî zêde rastî marjînalîzekirin û înkarkirina sîstematîk de bû, çi bi rêya bêparkirina mafên siyasî û çandî an jî bi rêya hewildanên dûrxistina wan ji saziyên dewletê û înkarkirina nûnertiya rastîn a ku armancên wan ên neteweyî û etnîkî nîşan dide. Piştî hilweşîna rejîma Baas û hêviyên berfireh di nav Sûriyeyê de ji bo îhtîmala avakirina Sûriyeyek nû li ser bingeha demokrasî, edalet û hevkariya rastîn di navbera hemî pêkhateyên wê de, qonaxa din diviyabû destpêka rastkirina xeletiyên dîrokî û bidawîkirina polîtîkayên dûrxistin û yekdestdariyê be.”
Di berdewamiya daxuyaniyê de wiha hat gotin: “Bûyerên dawî yên di derbarê hilbijartinên bi navê Meclisa Gel de bi zelalî berdewamiya heman zihniyetê eşkere kirin ku hewl dide zordariyê bi rê û amûrên cûda ji nû ve hilberîne. Tiştên ku di derbarê hilbijartinên Meclîsa Gel ên dawî de qewimîn îradeya rastîn a gelê Sûriyeyê nîşan nadin, lê belê berdewamiya nêzîkatiya dûrxistinê nîşan didin ku pêkhateyên cûda yên gelê Sûriyeyê bi dehan salan êş kişandine, bi taybetî pêkhateya Kurd, ku careke din bi sînordarkirina temsîliyeta xwe bi çar kursiyan hebûna wê ya siyasî bi zanebûn kêm kiriye. Her wiha kesên ku hatine erikdar kirin nûnertiya daxwaz û îradeya kurdan nakin, lê belê nûnertiya xwe û partiyên ku wan tayîn kirine dikin, dûrî her pêvajoyek demokratîk a rastîn in. Em van hilbijartinan û encamên wan bi tundî red dikin, ji ber ku di wan de pîvanên herî bingehîn ên şefafî û temsîliyeta dadperwer tune bûn. Ew ne li ser îradeya azad a gelê Sûriyeyê û pêkhateyên wê yên cihêreng bûn, lê belê beşek ji mekanîzmayekê bûn ku siyasetek yekalîbûn û yekdestdariya biryardana siyasî didomîne û zihniyetek derxistinê di bin cil û rêbazên nû de ji nû ve çêdike.”
Di dawiya daxiyaniyê de wiha hat gotin: “Em van hilbijartinan red dikin ji ber ku kesê hatin diyarkirin nikare gelê Sûriyê temsîl bike an jî xwestekên wan ên neteweyî îfade bike. Avakirina Sûriyeyeke demokratîk nepêkane bi hilbijartinên sexte an jî tayînkirinên ferzkirî pêk were, lê belê bi pêvajoyek siyasî ya dadperwer ku mafên hemî pêkhateyan bêyî cudahî an jî marjînalîzekirinê nas dike û rêzê li mafê gelan digire ku nûnerên xwe bi azadî hilbijêrin. Gelê Kurd, digel hemî civakên din ên Sûriyeyê, dê pabendî mafê xwe yê rewa yê temsîliyeta rastîn û beşdariya bi bandor di avakirina pêşeroja Sûriyeyê de li ser bingeha edalet, demokrasî û wekheviyê bimîne.”
