Navenda Nûçeyan
Yekîtiya Ragihandina Azad(YRE) ji bo Roja Şehîdan, daxuyaniyek li ser malpera xwe belav kir, şehîdên ragihandinê bi bîr anî û bang kir ku pêwîst e jiyana rojnamevanan ji xeteriyê were parastin.
Daxuyanî bi zimanê Erebî bû û naveroka wê wiha bû:
“Bi boneya Roja Şehîdan, em bi serbilindî û rêzdarî şehîdên çapemeniyê yên ku di dema pêkanîna erkê xwe yê pîşeyî û mirovî yê ragihandina rastiyê de canê xwe di xizmeta hişyarî û azadiyê de feda kirine, bi bîr tînin.
Şehîdên me peyama ragihandina azad bi dilsoziyeke mezin hilgirtin, hewl dan ku êşa civakê belge bikin, tevî xeterî û dijwarîyên giran ên ku ew di warê rojnamegeriyê de rastî wan hatin, rastiyan ragihînin û dengê rastiyê bigihînin her derê.
Bîranîna hevkarên me yên şehîd ne tenê bûyerek sembolîk e, lê belê nûkirina sozê ya ji bo berdewambûna mîrata wan e, rêya wan a ku bi xwîna xwe ya paqij xêz kirine, ji bo parastina rojnamegeriya profesyonel û azadiya derbirînê li dijî tarîtî û zordariyê ye.
Em pabendîbûna xwe ya mayînde bi nirxên bawerî û objektîfbûnê, herwiha parastina azadiya çapemeniyê wekî stûnek bingehîn a her civakek demokratîk ji nû ve piştrast dikin. Di heman demê de tekez dikin ku pêdivî bi parastina rojnamevanan û misogerkirina ewlehiya wan di hemû şert û mercî de heye.”
