Solîn Mihemed/ Qamişlo
Heyva Sor a Kurd bi boneya Roja Cîhan ya Telasîmyayê li navenda xwe ya li bajarê Qamişlo şahiyek li dar xist. Di şahiyê de zarokên nexweşên telasîmiyayê û malbatên wan, rêxistin û kesên ku alîkariyê didin nexweşxaneyê amade bûn.
Bi boneya Roja Cîhan ya Telasîmyayê Heyva Sor a Kurd li navenda xwe ya li bajarê Qamişlo şahiyek lidar xist. Di çalakiyê de zarokên bi nexweşiya Telasîmya û malbatên wan, rêxistin û kesên bi nexweşxanê re dibin alîkar hazir bûn.
Di destpêka şahiyê de deqeyek rêzgirtin li ser giyanê şehîdan hat rawestandin.
Piştire li ser navê hevseroka Heyva Sor a Kurd Hediya Ebdullah axivî û wiha got: “Em îro kom bûne ji bo Roja Cîhanî ya Telasîmyayê. Îro roj dayikên van kesên nexweş bi hezarên êşan di hundirê xwe de jiyan dikin ku bi kenekî bi zor li ser lêvên xwe xêz dikin da ku hêz û hêviyê bidine wan zarokên xwe. Ya herî rastî zehmetî û êşê dibîne, dayikên kesên bi nexweşiya Telasîmyayê ne. Divabe Malbat hêzê bide zarokên xwe da ku jiyaneke xweş bijîn, ji ber mafê wan e jî ku weke her zarokekî û weke her ciwanekî jiyana xwe bi rengekî xweş bijîn. Em dixwazin di vê rojê de berî ku em Heyva Sor bin em wek kesayet li kêlekan van kesên nexweş bin, eger pêwistî hebe em ê her û her ji bo van kesan hebin. Ez hêvî dikim ku hişyarî çêbe, ji ber dema ku me nexweşxane vekir gelekî zehmetî hebû heya ku me xwîn peyda dikir ji ber her meh 400’ kîsên xwînê divên, ji ber vê yekê hêviya me ew e ku di riya vê rojê de jî hîn bêtir milet berê xwe bide nexweşxanê û xwînê ji bo zarokan bide.”
Paşê li ser navê beşa xwînê Meriyem Ehmed axivî û wiha got: Ji xwe nexweşiya Telasîmya nexwşiyeke malbatî ye. Zarokên bi nexweşiya Telasîmya her 15’ yan jî 20’ rojan pêwîstiya wan bi xwînê heye. Ji ber wê em xwîna wan diguherin da ku rewşa wan baş be. Em di Roja Cîhanî ya Telasîmyayê de bi hêvî û daxwaza şefa û kêfxweşiyê ji bo van zarokan re dikin.”
Piştî her du axaftinan jî du malbatên kesên bi nexweşiya Telasîmyayê hêviyên xwe anîn ziman. Her wiha Heyva Sor a Kurd sipasname li ser kesên ku xwîn pêşkêşî nexweşxaneyê kiribûn belav kirin. Di berdewamiya şahiyê de jî zarokên bi nexweşiya Telasîmyayê bi dilekî kêfxweş dîlan girtin.
Şahî bi koma stranan bi dawî bû.
