Ronahî Sadûn/Qamişlo
Parêzer Ciwan Mihemed diyar kir ku ew rakirina tabelaya Koşka Edaletê ya Hesekê ya bi zimanê Kurdî şermezar dikin û got, “Gelê Kurd bi salan li hemberî sîstema paşguhkirinê ya rejîma Baasê li ber xwe da, eynî demê niha jî em ê li ber xwe bidin. Li hemberî vê yekê jî helwesta me diyare ku em qet bi vî rengî qebûl nakin.”
Hikumeta demkî li bajarê Hesekê tabelaya nasandinê ya li ser avahiya Koşka Edaletê ku bi zimanên kurdî û erebî hatibû nîvisandin rakir û li şûna wê tabelaya bi zimanên erebî û îngilîzî hilda. Ev yek jî nerazîbûneke mezin ji aliyê gelê Kurd ve nîşan da. Di heman demê de ev yek li dijî entegrasyona demokratîk e. Lewra ev yek hat şermezarkirin û rastî bertekên mezin hat.
Derbarê rakirina tabelaya nasandinê ya li ser avahiya Koşka Edaletê ku bi zimanên kurdî û erebî hatibû nîvisandin, parêzer Ciwan Mihemed ji Rojnameya me re axivî.
‘Helwesta me diyare, em van nêzîkatiyên hikumeta demkî qebûl nakin’
Ciwan Mihemed diyar kir ku ew nêzîkatiyên hikumeta demkî ya li ser avahiya Koşka Edaletê şermezar dike û wiha got: “Ev bûyera ku li bajarê Hesekên rû dan, wekî rakirina tabeleya ku zimanê Kurdî li ser hatibû nivîsandin û li şûna wê tabelayeke ku zimanê erebî û îngilîzî bê dayîn, ev cihê şermezarkirinê ye. Herwiha ev yek entegrasyonê nîşan nade, lê hewildaneke ji bo tunekirina nasnameya gelê Kurd. Di heman demê de ev rêbaz hevbeşiyê jî nîşan nade, lê bi hişmendiya rejîma Baas nêzî mijarê dibe. Li hemberî vê yekê jî helwesta me diyare ku em qet bi vî rengî qebûl nakin.”
‘Em ê kar û xebatê xwe di ber doza gelê xwe de, dewam bikin’
Ciwan Mihemed eşkere kir ku gelê Kurd zêdeyî 50’î salî li dijî rejîma Baas têkoşîn kir û zimanê xwe parast, îro jî wê biparêze û wiha domand: “Me gelê Kurd bi salan li hemberî sîstema paşguhkirinê ya rejîma Baasê li ber xwe da, eynî demê niha jî em ê li ber xwe bidin. Em ê kar û xebatê xwe di ber doza gelê xwe de, dewam bikin. Hikumeta demkî ya Sûriyê bi van hewldanan rêkevtinan binpê dike û hewil dide ku gelê Kurd tune bike. Heger berê bi rengekî leşkerî bû, niha bi rengekî din di rêya saziyên sivîl re, dixwaze vê yekê pêk bîne.”
‘Gelê Kurd li saziyan xwedî derketin’
Ciwan Mihemed da zanîn ku ew ne li dijî zimanê Erebî ne, lê divê hebûna zimanê Kurdî jî were parastin û wiha bilêv kir: “Gelê Kurd bi salan li Rojavayê Kurdistanê şoreşê dide meşandin. Parastin li ser saziyan kirin û bû altirnatîfeke xurt. Ev cihê şanaziyê ye, gerek hikumeta demkî li vê mijarê binere, weke cihekî spasiyê, ne wekî cihekî tunebûnê ku tenê alîgirekî bigre. Divê mafê her mirovekî di hundirê vî welatî de, diyar bibe û her bi azadî û nasnama xwe kar û xebatên xwe bidin meşandin. Em ne di cihekî qelis de ne, lê me bi hezaran şehîd dane. Ev nêzîkatiyên îro me ji rejîma Baasê re qebûl nekir, heya ku îro em ji hikumeta demkî re qebûl bikin.”
Ciwan Mihemed axaftina xwe wiha qedand: “Ka taybetmendiyên bajarên Kurdî û rêkeftinên ku çêbûne, ev ne rengê hevbeşiyê ye, lê ew dixwazin em tawîzan bidin, lê ev wê gelekî dûrî wan bin.”
