Ayşa Silêman/ Dêrik
Meclisa Malbatên Şehîdan li bajarê Dêrikê merasîma oxirkirinê yên 5 pakrewanên ku canê xwe ji bo axa Kurdistanê feda kirin, lidar xist.
Meclisa Malbatên Şehîdan li bajarê Dêrikê li goristana Şehîd Xebat Dêrikê, merasîma oxirkirinê ji du şervanên Hêzên Komandos Çiya Girkê Legê û Tofan Dêrik, her wiha sê şervanên Hêzên Ewlekariya Hundirîn Tehran Hacî, Hozan Efrîn û Şervan Mihemed, lidar xistin.
Di merasîmê de hemû şêniyên bajar û gundewarên wê, endamên sazî û desgehên Rêveberiya Xweser amade bûn. Merasîm bi rawestandina xuleyeke bêdeng li ser giyan şehîdan hate destpêkirin.
Paşê li ser navê Meclisa Malbatên Şehîdan Narîşan Efrîn axivî û wiha got: “Ez şehadeta van hevalên me yên leheng li we pîroz dikim, bila serê dayikên şehîdan sax bin. Ev 14 sal in em şoreşê bi rê ve dibin. Lê cîhan li ser serê me komployan pêk tîne, lê bila baş bizanibin tu kes nikare me qir bikin. Tu carî gelê kurd gavek bi şûnde ne avêtine, ev hêstirê ku em dibarînin hêstirê têkoşînê ne. Me çi sûc kirbû ku ev were serê leheng û qehremanê me, kesê ku carekî xapandin û îxanet kirî, wê bi hezarê caran jî bike. Em bûn ên ku me namûsa wan parast û ew ji DAIŞ’ê rizgar kirin, lê wan ji bo me çi kir? zarokên me şehîd xistin, dîl girtin û dilê bi hezaran malbat şewitandin. Bila dilê şehîdên me rehet bin, em ê tola wan hilînin û em ê heya dawiyê li ser şopa wan bin.”
Di heman demê de li ser navê Kongra Islama Demokrat Şêx Mesûm Dêrşewî axivî û wiha got: “Di pirtûka pîroz de xwedê aniye ziman ku şehîd cihê wan li buhiştê ye û kesên kuştin kirî cihê wan li dojehê ye. Şehîdên me ji hembêza me derketin û ketin di hembêza xwedê de û çûn li ber dilovaniya wî. Em xemgînin û çavên me bi hêstirên, lê em nabêjin sebra me nîne, lê em bi edaleta xwedê bawerin. Em hemû li xwedê vegerin, lê hin wê rû spî vegerin û hinek rû reş vegerin, lê şehîdên me wê rû spî vegerin, ji ber ku wan canê xwe ji bo vî welatî feda kir, ji bo parastina nirx û doza gelê Kurd.”
Di berdewamiya merasîman de li ser navê Hêzên Ewlekariya Hundirîn Ehmed Fedîl axivî û wiha got: “Destpêkê ez
sersaxiyê ji malbatên van lehengan re dixwazim, çiqasî em behsa şehîdên xwe bikin, axaftin têrê nakin. Divê em li pey doza wan bin û bighêjin xewn û xeyalên wan. Şehîdên me ji tunebûnê hebûnê çêdikin, ji mirinê jiyanê çêdikin, heya cane xwe feda dikin. Bi saya wan em ê serbest bijîn, em şopdarê xwîna van lehengane.”
Di dawiya merasîmê de, wesîqeya şehîdan hatin xwendin û malbatên wan hestên xwe anîn ziman. Piştre cenazeyên şehîdan spartin axê.
