Mihemed Seydi
Berî çend rojan, li ser tevna civakî Wêneyekî belav bû ku hinek cenaze di Ambelansê de hatine komkiirin û kîskirin. Hin malperên ku tên naskirin li pêyî çi ne, wêne belav kirin û îdia kirin ev cenazeyê şervanên Kurd in. Qaşo ev cenaze di destê hikumeta Şamê de ne û wiha dixwazine radestî QSD’ê bikin. Ev kesana an malperên bi navên ne rast û Kurdî, qaşo gelekî bi malbatên Şehîdan diêşin û xema wan dixun, xwe nîşandidin. Wiha jî dev davêtin rêveberiya QSD’ê û fermandarên wê reş dikin. Ev wêne ji aliyê çend malper û navan ve hat parvekirin ku hemû heman fikrin û heman têgehan bi kar tînin. Yanî, kesên wan bi rêve dibin hene û bi organîzekirî kar dikin da rêveberên Kurd reş bikin. Heman kesan di dema êrişên dawî li ser Rojava de jî heman hemle dest pê kirin û yek bi yek rêveber û aliyên siyasî yên ne li gorî dewleta Tirk, dikirin hedef.
Herwiha vê bûyera dawî û Wêne, gelekî mirov êşandin û ew jî ketin vê xefika belavkirina van agahî û postên bê bingeh. Gelek malbat ev yek bawer kirin û bû cihê aciziyeke gelekî zêde. Gelek kesên xwedî hestên welatparêziyê jî bê zanebûn post parvekirin û gotin gelo çima wiha tê serê Kurdan û ka çima rêveberiya Kurdan tiştekî nabêje. Piştre, derket holê, ev wêneyê Cenaze di kîsekî Naylon de, ji sala 2014’an ve ye û kesekî bi navê Hilo wê demê parvekiriye û ev vedigere cenazeyê kesekî Filestînî. Lewra mirov bala xwe dide bûyeran ku bi dereweyêk dikarin fitneyekê çêbikin û karê van kesan jî ev e û navên wan jî xuyayî ne. Ev kesana bi hestên malbatên Kurd ên Şehîdan û welatparêzan bazarê dikin û karê wan tevlîhevkirina navkolana Kurde, lê divê çawa pêşiya van kesan û tevgerên çetetî were girtin?
Di vir de erka herî zêde dikeve ser ragihandina fermî ya Rojava û saziyên wê yên heyî. Dîsa yên ku erkên wan ên fermî hene, divê van bûyeran bi çûk nebînin û berdevkên wan an jî saziyên pê ve girêdayî, li ser bûyeran tiştekî bibêjin û eşkere bikin ev bûyer ne rastin. Ji ber tevna civakî zêde tê şopandin, mirov dikevin bin bandora tiştên tên belavkirin, divê her bûyereke hesas bi milet, bê şirove û zelalkirina rewşê neyê hiştin. Di vir de rojnamegerên li Rojava, çalakvan, û her kesekî ji bo wan hestên malbatên Şehîdan bi qîmet, di bin van bûyeran de nemînin û paşguh nekin. Di her nivîseke xwe de van kesên li ser Tevna Civakî çetetiyê li hember gelê kurd dikin teşhîr bikin û bixwazin yên bi dilpakiya xwe li ber bayê van kesan dikevin, hişyar bin.
