Ayşa Silêman/ Dêrik
Jinên kedkar ên bajarê Dêrikê diyar kirin ku 1’ê Gulanê ji bo wan rojek pîroze û xwedî wateyeke cûdaye û wiha gotin: “Em vê roja girîng li Rêber Apo pîroz dikin, ji ber ku bi saya fikir û felsefeya wî jin gihişt roja îro.”
Yekê Gulanê li seranserê cîhanê wekî Roja karker û kedkaran tê naskirin û pîroz kirin. Ev roj koka xwe ji têkoşîna karkerên li Amerîkayê (Chicago) ya sala 1886’an digire, ku karkeran daxwaza kêmkirina saetên kar û baştirkirina mercên jiyanê dikirin. Piştî xwepêşandanên mezin û geravan, ev roj di sala 1889’an de ji aliyê Sosyalîstên Navneteweyî ve wekî roja karkeran hat qebûl kirin. Ev roj sembola yekîtî û piştgiriya karkeran e li dijî zilm û mêtîngeriyê.
Di derbarî 1‘ê Gulanê û bandora wê li ser jina karker jinên bi navê Nafiya Hisên û Narîman Xalid ji Rojnameya me re axivî.
Jin hêz û îradeyê dide civakê
Jina Karker Nafiya Hisên diyar kir ku ew roja kedkaran di serî de li hevjînê xwe yê şehîd pîroz dike û li hemû jinên ku kar û xebatê dikin û wiha got: “Di sala 2022’an min kişkek piçûk vekir û bi demê re min mezin kir da ku ez debara jiyana xwe pê bikin û malbata min hewceyî tu tiştî nebin. Bi hêvîme her jinek cihê xwe di nav karan de bigire û ew bi xwe xwe li pêş bixwe da ku ne hewcedarî tukesî be. Ji ber ku kesê li ser xwe nesekine û bi xwe re nebe alîkar tukes jî pêre nabe alîkar. Ev nêzî 12 sala ye min derfet nedaye tukesî ku xwedî li min û zarokên min derkevin bi ked û têkoşîna xwe ez wan bi rêve dibim. Ez gelek kêfxweşim ku îro roj hûn li vir hazirin da ku hûn derdê me nas bikin û bibînin jin çawa li ser xwe disekinin û kar dike, ji ber ku jin hertişte û şoreş bi navê jinê dest pêkiriye. Lewma dijmin ji îradeya jinê ditirse, careke din ez vê roja pîroz li her xebatkarekî kedê dide pîroz dikim.”
‘1’ê Gulanê xwedî taybetmendiyeke cûda ye’
Jina cawbir Narîman Xalid da zanîn ku 1‘ê Gulanê xwedî taybetmendiyeke cûdaye û bi vê boneyê li hemû jinên kedkar pîroz dikin û wiha got: “Ev 10 salên mine ku ez karê cawbiriyê dikim, him ji bo min hezkirineke him jî debara jiyana xwe dikim. Bi saya Şoreşa Rojava jinê karî cihê xwe di gelek qadan de bigre û bibe xwedî rol, her wiha bi dehan jinên wek min jî ku di hundirê malê de kar dikirin karîn karê xwe pêş bixin û berfirehtir bikin. Ez bi hêvîme ku her jina ku hêza wê hebe derkeve pêş û kar bike, ji ber ku di hundirê her jinekî de taybetmendiyeke cûda heye. Di dawiyê de ez roja Kedkaran li we û hemû kesên têkoşînê dikin pîroz dikim û bi hêvîme ku aramî û xweşî li welat belav bibe.”
