Ayşa Silêman/ Dêrik
Yekîtiya Xwendekaran a bajarê Dêrikê bi rêya meşekê nerazîbûna xwe derbarê biryara hikumeta demkî ji bo guhertina navên dibistana ji navê şehîdan, nîşan dan.
Yekîtiya Xwendekaran a bajarê Dêrikê bi rêya meşekê nerazîbûna xwe derbarê biryara hikumeta demkî ji bo guhertina navên dibistana ji navê şehîdan, nîşan dan. Di meşê de hemû rêveber û mamosteyên dibistanan li gel xwendekaran amade bû.
Meş ji Desteya Perwerdeyê bi siloganên ‘zimanê me hebûna me ye, bê ziman jiyan nabe’ dest pê kir û li pêşiya Meclisa Malbatên Şehîdan veguherî mêtîngê.
Mêtîng bi xuleyek bêdengî li ser giyanê şehîdên azdiyê û rûmetê dest pê kir, paşê li ser navê Yekîtiya Xwendekaran daxuyanî bi zimanê kurdî û erebî hat xwendin.
Di detpêka daxuyaniyê de wiha hat gotin: “Em xwendekar Parêzvanê nirxên xwe yên civakî ne. Çanda me, zimanê me, dîroka me, şehidên me û hemû nirxên mẹ yên civakî xeta me ya sor e. Parastin û mezinkirina wan nirxan erkê me yê mirovahî ye. Bingehê wê jî ji perwerdê dest pêkiriye. Hikumeta demkî ya Şamê, di pevajoya dawî de êrişî mafên mẹ yên mirovahî dike. Xwesteka rakirina navê şehîdan ji dibistanan nêzîkatiyên li hemberî pirtûkên Kurdî û her wekî din vê yekê nîşan dide. Tu têkiliya van bi demokrasî û lihevhatinê re nîn e. Perwerdeya bi zimanê dayikê mafekî sereke ye, di serî de zarok û her gel xwedî wê mafê ye. Di heman demê de navê dibistanên me li ser navê şehîdên me ne û ev yek nîşaneya armanca me ya perwerdeyê dike.”
Di dawiya daxuyaniyê de wiha hat gotin: “Yên ku em gihandin vê rojê şehîdên me ne, em pêşeroja xwe li ser mîrateya wan ava dikin. Em weke xwendekarên Dêrikê êrişên ku li ser perwerdeya me ya bi zimanê dayikê herwiha li ser navê şehîdên me tên meşandin qebûl nakin û şermezar dikin. Em dibejin ku; ji bo pêşerojek bi rûmet, civakek azad û demokratîk em ê heta dawî mafên xwe yê perwerdeyê û nirxên xwe yên civakî biparezin.”
