Hêvî Keleş/ Kobanê
Rêveberiya Şaredariya Kobanê Almaz Rûmî eşkere kir ku tayînkirina wê gaveke ji bo zêdekirina rola jinan di saziyan de. Tevî zehmetiyan û nebûna nûneratiya têrker, wê ji bo baştirkirina xizmetguzariyan li Kobanê û parastina taybetmendiyan berdewam bikin.
Bi guhertinên siyasî û îdarî ku li Sûriyeyê, çêbûn tevgera û rêxistinên jin jî beşdarî ji nû ve avakirina saziyan û xurtkirina rola jinan dibin, di nav wan de Almaz Rûmî ku di sazî û karê giştî de, gelek berpirsiyarî girtiye ser xwe da ku xizmeta civaka xwe bike û bi pirsgirêkên heyî yên xizmetguzarî û siyasî yên li herêma Kobanê re rû bi rû bimîne. Bicîhanîna peymana 29’ê Çile ya di navbera Hêzên Sûriya Demokratîk û Hikûmeta Demkî ya Sûriyeyê de berdewam dike. Armanca vê peymanê ew e ku saziyên sivîl û leşkerî yên QSD’ê di nav yên Hikûmeta Sûriyê de entegre bike. Di 9’ê Nîsanê de, bi razîbûn û piştgiriya xelkê Kobanê, Almaz Rûmî wekî Rêveberiya şaredariya Kobaniyê hate tayînkirin, ku ev gaveke girîng di pêvajoya entegrasyonê de ye, ji ber ku ew yekem jin e ku di vê astê de cihek fermî digire. Almaz Rûmî wekî yek ji pêşengên Şoreşa Rojava derdikeve pêş, ji perwerdeyê bigire heya xebata saziyî, gihîştiye serokatiya şaredariya Kobanê, ew bi vê rola jinan di biryardanê de piştrast kiriye.
Almaz Rûmî kî ye?
Almaz Rûmî wek jineke Kurd, ji destpêka şoreşa Rojava heta niha di nav kar û xebatên de cîh girtiye. Ew di sala 1989”an de li gundê Helencê yê li gundewarê Kobaniyê ji dayik bûye, berî ku xwendina xwe li Enstîtuya Sporê ya li Helebê bidomîne, li wir xwendina xwe ya bingehîn wergirtiye. Navê wê bi destpêka Şoreşa Rojava re wekî yek ji pêşengên avakirin û avakirina saziyên rêveberiya xweser derket holê, piştî wê dest bi kariyerek xebatê kir ku zêdetirî 14 salan dom kir, di nav de di navbera gelek Karan de geriya, destpêkê bi Yekîtiya Mamosteyan, dû re Desteya Ciwanan û Werzîşê û dû re jî Desteya Jinan. Her wiha di hevrêzkirina Kongreya Star û Partiya Yekîtiya Demokratîk (PYD) de rolek lîst. Ji karê wê di warê jîngehê de wekî hevseroka Desteya Jîngehê, bigire heta tayînkirina wê wekî rêveberiya şaredariya Kobanê, bi vî awayî bû yekem jina ku di qonaxa entegrasyonê de di nav saziyên bajêr de xwedî cihek fermî bû. Girêdayî vê mijarê Rêvberiya Şarederiya bajarê Kobanê Almaz Rûmî ji Rojnameya me re axivî.
‘Têkoşîna jinan tevî zehmetiyan jî berdewam dike’
Rêveberiya Şarederiya Kobanê Almaz Rûmî tayînkirina xwe wekî gaveke erênî ber bi beşdariya jinan ve dît û got: “Ev gav di çarçoveya qebûlkirina jinan di nav saziyên hikûmetê de erênî ye, nemaze ji ber ku ev sazî berê bi hişkbûna xwe ya li hember pirsgirêkên jinan dihatin nasîn. Namzedkirina min û qebûlkirina min ji aliyê wan ve wekî surprîzek hat, lê di heman demê de ew guhertinek nîşan dide ku dikare li ser were avakirin. Têkoşîna jinan tevî zehmetiyan jî berdewam dike, em ê bi berdewamî bixebitin da ku jinan ji astengiyên civakî rizgar bikin û bikaribin rola xwe ya pêşeng bilîzin. Berpirsiyarî îro mezintir e, lê em ji şiyana jinan a îspatkirina hebûna xwe li cîhên kar ên cûrbecûr bawer in. Derbarê beşdarbûna min di civînên ku li Parêzgeha Helebê ji bo nîqaşkirina cîbicîkirina bendên peymanê hatine lidarxistin de. Di civînan de temsîliyeta jinan tune bû, ji ber ku di şandeya ji Kobaniyê de tenê du jin hebûn. Me di salên borî de li ser bilindkirina pirsgirêkên jinan û balkişandina ser rola wan û pêwîstiya ku ew di nav saziyan de bibin şirîkên biryardanê, xebitîn.”
‘Em hewil didin ku xizmetekê baş ji xelkê kobanê re bikin’
Almaz Rûmî derbarê rewşa xizmetguzariya bajêr de, got ku Kobanê zehmetiyan dikişîne: “Bajar di dîrokê de ji bêparbûnê êş kişandiye û di salên şer de ji ber êrîşan rastî wêraniyeke mezin hatiye, ku rasterast bandor li binesaziya wê kiriye. Tevî hewldanên berê jî, ew hîn jî ji bo baştirkirina rewşa xizmetguzariya xwe piştgiriyeke rastîn hewce dike. Em hewl didin ku xizmetekê baş ji xelkê Kobanê re peyda bikin û asta xizmetan baştir bikin. Ev yek hewldanên hevkariyê û piştgiriyek berdewam hewce dike. Kobanê ji ber berxwedana xwe ne tenê li herêmê, lê di heman demê de li seranserê cîhanê jî xwedî girîngiyeke sembolîk a taybet e. Me ev wêne û pêdiviyên wê yên xizmetguzariyê anîn ziman bi hikûmetê û wan jî hevkariya xwe di vê çarçoveyê de nîşan dan. wan xwestin ku navê bajêr biguherînin, lê me pabendbûna xwe bi navê Kobanê re, ji ber girîngiya wê ya sembolîk a mezin, bi taybetî piştî berxwedana wê ya li dijî DAIŞ’ê, piştrast kir. Niştecih jî guhertina navê Kobanê red dikin û ev yek ew tişt e ku me di nîqaşan de tekez kir û em ê berdewam pê ve girêdayî bin.”
‘En bang li gel dikin ku piştgiriya vê qonaxê bikin’
Di dawiyê de, Rêvberiya Şaredariya Kobanê Almaz Rûmî li ser helwesta niştecihan a derbarê pêvajoya entegrasyonê de axivî: “Em fêm dikin ku hin kes fikarên xwe hene, lê em bawer dikin ku ev gav ji bo parastina destkeftiyên qonaxa berê, organîzekirina xebata saziyî û parastina karakterê bêhempa yê herêmên me pêwîst bû. Ji ber vê yekê, em soz didin gelê xwe ku em ê li gorî vê berpirsiyariyê tevbigerin û em bang li wan dikin ku piştgiriyê bidin vê qonaxê.”
