Esmihan Gedro/Qamişlo
Berdevka Kongra Star ya taxa Enteriyê a bajarê Qamişlo Ahîn Ibrahîm diyar kir ku dive tevahî saziyên jin cihê xwe di destûra Sûriyê ya nû de bigirin û got, “Divê nûnerên jinan li ser xeta azadiya jinê û hêza wê tevbigerin“.
Di derbarê mijara parastina mafê jinan di destûra Sûriyê de û cihgirtina jinan di saziyên dewletê de, berdevka Kongra Star ya taxa Enteriyê a bajarê Qamişlo Ahîn Ibrahîm ji Rojnameya me re axivî.
‘Em dixwazin wek saziyên jinan cihê xwe di destûrê de bigirin’
Ahîn Ibrahîm di destpêka axaftina xwe de wiha got: “Sê meh di ser peymana 29’ê Çiliyê re ya bi hikumeta demikî re derbas dibin, lê heta niha tevî gave entegerasyonê heta niha hikumeta demikî jinan qebûl nake. Şoreşa Rojavayê Kurdistanê şoreşa jinê bû û emê weke jin heta dawiyê banga mafê xwe bikin û têkoşînê bilind bikin. Me bi hezaran şehîdên xwe dane vê şoreşê û me gelek kar û xebat daye meşandin. Jin ne tenê gotineke, lê belê jin jiyan e, jin civak e û xweza ye, ji ber vê yekê divê hikumeta demikî jinan qebûl bike.”
‘Jin pêşeroja civakê ye’
Ahîn axaftina xwe wiha berdewam kir: “Jin pêşeroja civakê ye. Weke nêrîna Serokê Hikumeta Demkî ya Sûriyê Ehmed El-Şeri di hevdîtina xwe ya dawî li Almaniyayê anî ziman ku ew wek hêza jinên Sûriyê weke lîwa di nava xwe de qebûl nakim. Lê bila ew bizanibe YPJ`ê nasnameya me ye weke jin, hêza me ya leşkerî ye û divê di artêşa Sûriyê de cihê xwe bigire. Nûnerên jinan di saziyên dewletê de divê bi pergala hevserokatiyê, wekheviya zayendî û birêxistinbûnê cih bigirin. Heger jin di van saziyan de neyê qebûlkirin em ê her tim li qadan bin û têkoşînê bikin. Ji ber ku yê îro li hemberî dewleta serî netewandiye YPJ`ê ye.”
‘Wê berxwedanî berdewam bike’
Ahîn destnîşan kir ku 15`sal in di Rojavayê Kurdistanê de jinx we birêxistin dikin û wiha pê de çû: “Em rêxistina jinan bi pêş dixin,ji ber çalakiyên me hene, nasnameya me heye û civaka me jî heye. Ger em vegerin dîrokê jin çawa xwe di dîrokê de cih girtibû gerek mafê me jî di dewleta Sûriyê de jî bê girtin. Xwesteka me jinan jî berdewamkirina berxwedaniyê ye. Divê di saziyên dewletê de nûnerên jinan cihê xwe bigrin.”
‘Divê em weke jin xwe birêxistin bikin’
Ahîn Ibrahîm axaftina xwe wiha qedand: “Divê nûnerên jinan li ser xeta azadiya jinê û jiyana komun tevbigerin, da ku şoreşa civakî û destkeftiyên jinan misoger bikin. Gelek axaftin di aliyê dewleta Sûriyê de tê kirin ku jin, sazî û meclîs namînin ev hemû biryar di destê me de ye ne di destê dewletê de ye. Em weke jinên sûrî bangewaziya me ji hemû jinan re heye ku daxwaza mafê xwe bikin. Divê em weke jin xwe bi rêxistin bikin. Gerek jin di her aliyê kar de xwe bipêş bixe, divê jin hêza xwe ya parastina cewherî û îdeolojîk xurt bikin.”
