Ayşa Silêman/ Dêrik
Bi boneya 1’ê Nîsanê Cejna Ekîto li gundê Hekemiyê yê girêdayî bajarê Dêrikê welatiyên Kildan û Asûrî bi şahiyekî ev cejin pîroz kirin.
Welatiyên Kildan û Asûrî di 1’ê Nîsanê de Cejna Ekîto pîroz dikin, li gorî jêderên aşûriyan ev cejin ji 6 hezar û 774 salan ve û heta niha tê pîroz kirin. Aşûrî dibêjin ku cejna Akîto sersala Aşûriya ne û bi zimanê Aşûrî ‘Xanîsan’ lê tê kirin. Li gorî baweriya wan di vê rojê de dema xêrêye û destpêka buharê ye. Li gorî evsaneya aşûriyan di vê rojê de xwedawenda evînê Eştar bi ‘xwedawendê xwezayê Temûz re zewiciye’ Di evsaneyê de behsa nakokiyên di navbera Eştar û Temûz de tê kirin. Gelên Aşûrî û Siryanî di 1’ê meha Nîsanê de cejna sersala nû Ekîto pîroz dikin. Li gorî kevneşopiyên Aşûriyan di cejna Ekîto de li çolan û di nava xwezayê de ahengên curbecur têne lidarxistin.
Li gundê Hekemiyê yê girêdayî bajarê Dêrikê cejna Ekîto bi amadebûneke girseyî ji nûner û partiyên siyasî, rêveber û endamên Saziyên Rêveberiya xweser hat pîroz kirin. Di destpêka şahiyê de hemû hazir xulek bêdeng li ser giyanê şehîdan rawestiyan.
Di berdewamiya şahiyê de li ser navê Partiya Yekîtiya Siryaniyan Seydê Ibirahîm axivî û wiha got: “Mêvanên me yên hêja û endamên civaka me yên ku îro beşdarî pîrozbahiya Akitu – Sersala Suryanî û Asûrî dibin, zimanê me, çanda me û cejnên me bingeha têkoşîna me ne. Ev ne tenê dirûşmeyek e ku em diqîrin, lê armancek e ku em li Sûriyeyê ji bo naskirinê hewl didin. Bi bidestxistina vê armancê, mafên desteserkirî dê vegerin xwediyên wan ên rewa û jiyan dê vegere laşek ku ji neheqî û bêparkirinê pir êş kişandiye. Dema ku gelê me yê Suryanî-Asûrî rola xwe ya rewa li Sûriyeyê bigirin ser xwe, Sûrî dê statuya xwe ya şaristanî, geşbûn û şewqa xwe wekî neteweyek ji bo hemî Sûriyan bi dest bixe, neteweyek ku bi dîroka xwe ya kevnar serbilind e. Festîvala Akitu, festîvala herî kevin a dîrokê ye, li vê axê, li axa Mezopotamyayê, ku şaristanî, zanist û pêşketin di hemî waran de da cîhanê û hemî mirovahiyê, derketiye holê.”
Seydê Ibrahîm wiha domand: “Di vê roja dîrokî de, em daxwaz dikin ku hikumeta Sûrî hemû mafên me yên neteweyî bi tevahî nas bike û wan di destûra bingehîn a Sûriyeyê de bicih bike. Her wiha em daxwaz dikin ku hikumet ji bo bidestxistina beşdariya rastîn a hemû hêzên siyasî yên demokratîk û nûnerên hemû civakên Sûriyeyê bixebite da ku qonaxa veguhêz bi serkeftî bi rê ve bibe. Yekîtîya hemû Sûriyeyê dê şert, qanûn û destûra bingehîn a pêwîst biafirîne da ku rê li ber Sûriyeyeke nû veke, Sûriyeyeke demokratîk, piralî û nenavendî. Sûriyeyeke ku maf û azadiyê diparêze. Yekîtiya me hêza me ye û hêz îro ji her demê bêtir pêwîst e. Hêz di gotinan de, di helwest û armancên yekgirtî de ye. Têkoşîna me ya siyasî berdewam dike û em bi soz û peymana xwe ya ji bo hemû şehîdên xwe re, ku xwîna wan dîrokeke nû nivîsandiye, dilsoz dimînin.”
Şahî bi dîlan û govendê hat xemilandin û bidawî kirin.
