Esmihan Gedro/Qamişlo
Wênesaza bi navê Zozan Betal anî ziman ku ew di nava malbateke hunerî de jiyan dike, Zozan da zanîn ku wê xwest hêz û berxwedana şervanên jin û yekîtiya Kurdan di tabloya xwe de bide xuya kirin.
Zozan Betal wênesazeke jin a Kurd e li bajarê Qamişloyê ye ku ev gelek carin tabloya wê derbasî Siwêd, Bakistan û Başûrê Kurdistanê bûye. Dema wê navê Kurdistan û keziya jina azad xêz kir ew tabloya wê derbasî Başûrê Kurdistanê bû. Wê ev tablo beşdarî Pêşangeha Berxwedana Rûmetê ya Wênesaziyê kiriye. Derbarê vê tabloyê de Zozan Betal ji Rojnameya me re axivî.
‘Ez di malbateke hunerî de dijîm’
Zozan Betal da zanîn ku ew ji malbatek hunerî û wênesaz e û wiha axivî: “Hevjîn û zaroka min jî şêwekar in. Lê tabloya min cudayî yê wan e. Ev bû 13 sal in ez karê wênesaziyê dikim. Hevjîn û kurê min bi ikîlib û fehim wênesaziyê dikin, lê ya min gelekî balkêş e ji ber ku bi kaxetan hatiye çêkirin, ez tu rengan bi kar nayînim tenê bi kaxizan çêdikim ji ber vê yekê ew ji hemû tabloyan cudatir e. Herwiha min xwest ez di vê pêşengeha “Berxwedan Rûmetê” de tabloya xwe parve bikim. Tabloya min ifadeya komkujiya ku li Şêxmeqsûd pêk hat ku çawa hevala jin ji jor de avêtin erdê û keziya wê wisa dimîne li erdê. Min jî weke jineke Kurd xwest ez di tabloya xwe de hêza jina Kurd û berxwedana wê û tekoşîna vîna jinê diyarî xelkê bikim, bila bizanibin tu carî keziya jina azad nayê birîn. Ger bi wênesaziyê be jî em ê tekoşîna jin bidin ber çavan. Ez tabloyên xwe hemiyan bi kaxetan wêne dikim wan kaxetan diqûsînim û pê gulan û tiştên destan çêdikim gelek şêweyên erkanê wê hene. ”
Min xwest ez di tabloya xwe de yekîtiya Kurdan nîşan bidim
Zozan betal da zanîn ku wê xwest yekîtiya Kurdan di tabloya xwe de biteyîsîne û wiha domand: “Ev tablo çar rojan di nava destê min de ma. Gelek zehmetî û sebir dixwaze. Li gorî ku ez tevî zarokên xwe û hevjînê xwe me, min dev ji wênesaziyê bernedaye tevî van zehmetiyan hevjînê min dibe alîkar bi min re. Min ji xwe gelek pêşengeh yên weke kolektîf, şexsî û hwd… çêkirine. Herwiha min li Başurê Kurdistanê jî wênesazî kiriye tev malbata xwe tabloyên kolaktîf pêşkêş kirine. Ji xwe weke em dibînin di tabloyên me de hemû kezî ne bi rastî gelekî dilê me Kurdan êşand van bûyeran. Yê ku çeteyên dewleta Tirk xwe pê didît, em jî gelek bi wê bûyerê diêşiyan, lê ev bûyer bû sembola berxwedanê ji şervanên Kurd re. Di tabloya min de du şervan in yek dûrî dixe êşa xwe, xweşiya xwe dibêje û ya din jî keziya wê şervanê keç dihûne. Min jî xwest ez di tabiloyê de yekîtiya Kurdan bidim xuyakirin û bi yekîtiya gelê Kurd em ê Kurdistanekê ava bikin.”
‘Bi rêya êş û xemgîniyê tablo saz dibin’
Zozan destnîşan kir ku wênesazî bi riya êş û xemgîniyê tablo tên sazkirin û wiha bi dawî kir: “Wênesazî ji piştgiryê tê, ji dilê mirov û tiştê di hundirê wê de derdixe ber çav. Dema ku ew kesê wêneyê bi xêzên xwe rêzikan xêzdike êş û xemgîniya xwe di tabloya wêneyî de şîrove û xuya dike. Tevî zehmetiyên ku em niha tê de jiyan dikin, lê dîsa em dest ji wênesaziya xwe bernadin û her tim wê tabloyên me yên dewlemend bimînin.”
