Solîn Mihemed/ Qamişlo
Hevserokê Meclisa Qamişlo Izedîn Gedo da diyarkirin ku ew ji 9’ê Adarê ve dest bi amadekariyên Cejina Newrozê kirin e û wiha got: “Em ê wek her sal Newrozê pîroz bikin”
Cejina Newrozê, cejneke çandî û dîrokî ye ku ji aliyê gelê kurd û gelek gelên din ên cîhanî ve her sal di 21’ê Adarê de li seranserî cîhanê tê pîrozkirin. Her sal di miha Adarê de nêzî Cejina Newrozê ji aliyê meclisan ve amadekarî ji bo wê rojê têne kirin. Niha jî di vê salê de Meclisa Qamişlo ji hemû alî ve amadekariyên Newrozê dike.
Di derbarê amadekariyên Cejina Newrozê de hevserokê Meclisa Qamişlo Izedîn Gedo ji Rojnameya me re axivî.
‘Ji 14’ê mihê de em ê dest bi cejina xwe bikin’
Izedîn diyar kir ku ew dest bi amadekariyên Cejina Newrozê dikin û wiha got: “Em wek Meclisa Bajarê Qamişlo amadekariyên Cejina Newrozê dikin. Niha em li hemû kolanên bajarê Qamişlo ji bo nêzîkbûna cejina Newrozê bi alan dixemilînin. Ji 14’ê mihê de em ê dest bi cejina xwe bikin. Ji bo cejina Newrozê em ê ji milet re daxuyênin da ku dest bi cejinê bikin. Herwiha wê ji 14’ê mihê de her şev li cihekî taxên bajarê Qamişlo wê agirê Newrozê were gurkirin da ku milet cejina Newrozê bi kêfxweşî pêşwazî bike. Ji bo pêşwazîkirina Cejina Newrozê wê li hemû taxên bajarê Qamişlo şahî werin lidar xistin, 14’ê Adarê wê li taxa Cûdî, taxa Hilêliyê û gundê Tenûrî, Herwiha 15’ê Adarê li taxa Aşûriyê û gudê Girbawiyê, 17’ê Adarê li taxa Xerbî û taxa Enteriyê, 19’ê Adarê li taxa Kornîş û taxa Qdûrbek, 20’ê Adarê serdana goristana şehîdan wê were kirin û 21’ê Adarê Cejina Newrozê ye.”
‘Heya Cejina Newrozê wê amadekarî berdewam bin’
Gedo da xuyakirin ku wan du civîn li dar xistin û tê de amadekariyên Cejina Newrozê hatin plankirin: “Di vê demê de me du civîn ji bo amadekariyên Cejina Newrozê li dar xistin. Di civînê de daxwazên amadekariyan yên ku bêne kirin hatin gotin. Ji xwe wê şahiya Cejina Newrozê li Hîmo were lidarxistin. Heya Cejina Newrozê wê li Hîmo amadekarî berdewam bikin. Di şahiyê de wê gelek kom werin û bi stran û govendên xwe yên xweş pêşkêşî milet bikin. Di heman demê de jî wê gelek amadekariyên din ji bo roja Cejina Newrozê werin kirin.”
‘Em ê wek her sal Newrozê pîroz bikin’
Izedîn Gedo di dawiya axaftina xwe de bal kişand li ser roja Cejina Newrozê û wiha got: “Em ê Cejina Newrozê wek her sal pîroz bikin. Cejina Newrozê cejineke ku tevahî Kurd wê rojê pîroz dikin. Her tim Cejina Newrozê ji bo gelê Kurd rojeke nû ye. Ji xwe em niha di demeke pir nazik re derbas dibin û em dibêjin wê ev Newroz yekîtiya gelê Kurd be û herwiha azadiya gelê Kurd be.”
