(N.P)
Li bajarê Reqayê piştî ketina Hikûmeta Demkî ya Sûriyeyê hejmara jinên neçarî parsektî kirine, zêde bûye û her biçe wê rewşa jin hîn bêhtir têkevê xeteriyê de.
Li bajarê Reqayê hejmara jinên ku parsektî dikin her diçe zêde dibe. Jinên ku zanîngeh bi dawî nekirine, ne xwendine, yên hevjînên wan mirine û ji malbat û eşîreta wan kesek xwedî li wan derneketine nikarin kar peyde bikin û bixebitin. Tenê hinek rê li pêşiya wan hene, yan wê li mal û daîreyên hikûmetî û taybet weke xizmetkar bixebitin, yan wê biçin gundan weke karker bixebitin an jî wê li bazara Reqayê parsektî bikin. Ev axavtin ji aliyê jineke Reqayî û ji êla Afadla ye, hat kirin. Jina ji Reqayê ji ber rewşa ewlekariyê nexwest ku navê wê were naskirin.
Di wextê Rêveberiya Xweser de jina ku dibistana amadeyî bi dawî kiriye, li saziyan dixebitî. Piştî 19`ê Çile Hikûmeta Demkî ya Sûriyeyê ketin Reqayê ew dayîk bê kar ma ye. Mîna wê bi sedan jin bê kar mane. Çarenûsa hemû jinên bêkar mîna ya wê ye.
Li gorî çavkaniyên herêmî piştî Hikûmeta Demkî ya Sûriyeyê derbasî Reqayê bûye hejmara jinên ku li ser wan ferz dikin parsektî bikin, gelekî zêde bûye. Jinên kar ji bo wan nayê peyde kirin, di wê civakê de destdirêjî rûmeta wan dikin. Eger bibin karker saetên dirêj di nava zeviyan de dixebitin, mûçeyê wan kême û destdirêjî li wan tê kirin. Eger nebin karker wê li malên zengînan an jî li daireyên hikûmetê û yên taybet karê paqijiyê bikin. Riya dawî ku didin pêşiya wan mêr li malê dimînê, hevjîn û keçên xwe rêdikin bazara Reqayê parsektî bikin.
Li Reqayê jin neçarî parsektî, xizmetkarî û kardestî dikin. Bi van her sê diyardeyan re nirxên civakî têne binpêkirin û îhanetê li rûmeta jinê tê kirin.
Eger rewşa jinan li Reqayê wisa berdewam bike wê jinan weke araceke têrkirina ajoyên mêr, li malên giştî bidin bikar anîn.
