Ahmet Aktaş
Li herêma Rojhilata Navîn, hêza gelê Kurdistanê û jeostratejiya erdnigariya Kurdistanê, ji siyaseta hemû dewlet û rêxistinên din pirtir e û xwedî hêza herî bi bandor e.
Mirov bala xwe dide analîz û şîroveyên nûnerên dewletan û rêxistinan, herwiha gelek akademisyen û siyasetmedaran, hema hema bi giştî dudil in, an jî filan dewletê, bêvan serokên dewletan bi bandor nîşan didin.
Dîtin û şîroveyên van kes û nûneran, ji rastiyê dûr in, a rast li Kurdistanê li ber çavan e.
Herî dawî, bi taybetî li Rojava ev rastiya, bi berxwedan û hilwesta gelê Kurdistanê ya tije ruhê yekîtiya neteweyî, gelek aşkere, zelal û şênber derkete holê.
Vê hilwest û berxwedana bêsînor a gelê Rojava, gelê her çar parçeyan û derveyî welat, li gel dostên Kurdan jî lihev civand.
Vê carê ev çarperçeyîbûn û koçberîbûna cîhanê, berevajî, erênî bû û kete xizmeta doza neteweyiya gelê me û mirovahiya navneteweyî.
Rast e, heta nuha çarparçebûna Kurdistanê neyînî bû, ji ber ku ev, encamê siyaseta navdewletî bû û gelek êş, keder û keser bi gelê Kurdistanê dan kişandin û didin kişandin, lê bi saya rêberiya rast û têkoşîn û berxwedana lehengî, gelê me, xwe bi rêxistin kir, îradeya xwe xurtir kir û niha, li ser her çar welatên dagirker û bi giştî li hemû herêma Rojhilata Navîn bûye xwedî hêza herî bi bandor.
Herwiha divê ev mijara giring jî were nîşandan, ji ber ku bi têkoşîn û pêşengiya xwe jinên Kurdistanê, bi dirûşma Jin, Jiyan, Azadî nav û dengê xwe yê erênî, bi xurtî gihand tevaya cîhanê.
Niha di vî şerê DYE-Israil û Îranê de, ku ji derveyî daxwaz, îrade û berjewendên gelan hatiye despêkirin, her aliyên şer dixwazin hêza gelê Kurdistanê bikişîne rex xwe û bixin xizmeta siyaseta xwe ya hegemonîst a qirêj.
Lê giraniya tevgêrên Kurdistanê, hilwesta xwe kirin yek û xwe ji derveyî bandora siyaseta kedxwar û şerxwaz a dewletan girtin, belê xwe, li ser rêya sêyemîn a berjewendiyên gelê xwe dan nîşan dan.
Bêgûman, him dewleta meleyan ku gel weke Komara “Îdamê” bi nav dike û him dewletên DYE/ISRAILê, ji vê hilwestê razî nebûn.
Lewma dest avêtin bangeşiyên derew, daxwiyaniyên li goreyî berjewendên dewletên xwe dan û heta hinek êrîşên leşkerî jî birin ser cihên tevgêrên Kurdan.
Belê him Tevgêrên gelê Kurdistanê, bi lez derewên van dewletan şermezar kirin û him gelê Kurdistanê jî baweriya xwe bi van dewletan neanîn, ya hêja û rast jî ev hilwest bû.
Li goreyî agahiyan, bi beşdarbûna yek rêxistinek dîtir, hijmara Rêkeftina Tevgêrên Rojhilatî bûn şeş, hêvî heye ku ew yek rêxistina mayî jî beşdar bibe û serkeftina xwe jî nêztir bikin.
Heke mirov bala xwe bide pêvajoya bi tevayî ya Kurdistanê û herêmê, wisa diyar dibe ku gelê herî bi rêxistin û xwedî rêberî û programa rast û xurt gelê Kurdistanê ye.
Lewma dikare were gotin; ku cara berê li ROJAVA, vê carê jî li ROJHILAT, gelê Kurdistanê dibe xwedî Rêveberiyek Xweser a Demokratî.
Bi xêr bê ŞOREŞA ROJHILAT!
