Solîn Mihemed/ Qamişlo
Meclisa Partiya Yekîtiya Demokratîk PYD’ê bi boneya roja 8’ê Adarê li bajarê Qamişlo şevbuhêrkeke hunerî lidar xist.
Bi boneya roja 8’ê Adarê meclisa Partiya Yekîtiya Demokratîk PYD’ê li navenda xwe yê bajarê Qamişlo şevbuhêrkeke hunerî lidar xist. Di çalakiyê de rêxistinên civaka sivîl yên Cizîrê, sazî û rêxistinên jinan û endamên Partiya Yekîtiya Demokratîk PYD’ê hazir bûn.
Di destpêka çalakiyê de deqeyek rêzgirtin li ser giyanê şehîdan hat rawestandin.
Piştire li ser navê Rêvebera Meclisa Jinê ya Partiya Yekîtiya Demokratîk PYD’ê Netawî Gimgîn axivî û wiha got: “Em roja 8’ ê Adarê li tevahî jinên Cîhanê û herwiha li hemû jinên azadîxwaz û jinên têkoşer yên di hemû qadan de tekoşînê dikin em wan pîroz dikin. Roja 8’ê Adarê bi têkoşîneke mezin ya jinan hatiye kirin. Îro bi hezaran jin şehîd ketin, herwiha bi hezaran jin jî berxwedanî dan. Dema ku em silogana Jin, Jiyan, Azadî dibêjin ne tenê gotineke ku em dibêjin lê belê serbildahiyeke ji bo hemû jinan. Eger îro pirsgirêka gelê Kurd û pirisgirêka jinê çareser nebê tu carî pirisgirêka Rojhilata Navîn çareser nebê. Eger hemû jin destê hev negirin û yekîtiyên xwe çênekin û herwiha rêxistinên xwe ava nekin nikarin li hembrî vê sîstema hovane ya ku bi hezarên salan li ser jinê tên e meşandin werin rakin. Ji bo vê gereke jin her tim xwe bidin xuyakirin ku hene wê hebin û wê li heberî her tiştên ku li ser wan tê kirin rabin.”
Piştî axaftinê stiranên kevneşopî yên dema berê ji aliyê Nebîha Mihemed, Sînem Şawîş û Yadê Suad ve hatin pêşkêş kirin. Piştire jî sinvziyonek di derbarê çalakiyên meclîsa Jinê ya Partiya Yekîtiya Demokrat PYD’ê de hat pêşkêşkirin.
Di dawiya şevbuhêrkê de bi siloganên “Jin, Jiyan, Azadî û Bê Serok Jiyan Nabe” hat bidawîkirin.
