Ayşa Silêman
Bi salan, li herêma Cezîrê, şîn bûyerek ji bo hevgirtinê bû, ku mirov li kêleka xemgînan radiwestiyan, sersaxî pêşkêş dikirin û êşa wan sivik dikirin. Sadehiya van rojan taybetmendiya wê bû, serdanek û peyvek xweş ji her tevgereke din girîngtir bû. Lêbelê, di salên dawî de, dîmen guheriye. Aheng mezintir bûne û hejmara sewalên ku tên serjêkirin zêde bûye, heta wê astê ku hin kombûnên şînê niha wekî bûyerên nîşandana dewlemendiyê têne hesibandin, ne wekî cihên xemgîniyê û piştgiriyê ji bo miriyan. Bi vê guhertina nexweş re, barê herî mezin niha dikeve ser milên feqîran. Gelek malbatên hejar niha dema ku kesekî ji malbata xwe winda dikin xwe bêçare hîs dikin. Dema ku xelkê herêmê bi adetên mîrasî yên amadekirina xwarinên gelek ve girêdayî ne, feqîr nikarin xwe bigihînin hev. Li şûna ku balê bikişînin li ser hevgirtinê û ji nû ve yekkirina xizmên xwe, ew xwe di bin zextek mezin a civakî de dibînin: Gelo “Ew çawa dikarin tiştê ku yên din pêşkêş dikin pêşkêş bikin?” Mixabin, di hin rewşan de, mirov ji tirsa gotegotan û rexneyên civakî, ji bo lidarxistina merasîmek cenazeyê, ne kêmtir ji yên din serî li deynkirina pereyan didin. Xuyabûn bûye esas, ji ber ku gelek kes hene pesnê xwe didin ku merasîma cenazeya herî mezin û herî zêde wî çêkiribû. Lê armanca rastîn a merasîma sersaxî ye, ne nîşandana xwe ye. Ev tevger bi awayekî nehevseng zirarê dide xizanan, ji ber heya ku ew xwe kêmtir nîşan nedin, ji derfetên xwe zêdetir bar digirin. Îro, a girîng ew e ku ev adet ji nû ve werin nirxandin. Peyama mirovî ya merasîma cenazeyê ne hewceyî pesindan û qurbaniyan ne. Bese ku mirov bi gotinên dilsoz, piştgirî û hestên rastî li kêleka malbata xemgîn bisekinin. Mirin ne fersendek e ji bo pêşandanê, lê belê bîranîneke nirxên dilnizmî û dilovaniyê ye, ku em hemû mehkûmî wê ne ku rojekê ji vê dinyayê derkevin. Vejînkirina vî ruhî di cenazeyê de li herêma Cizîrê hêsane, dema ev yek hat sererast kirin wê ji bo herkesî bibe destkeftiyek civakî û exlaqî, nemaze ji bo xizanan, yên ku ji bo adetek ku wateya xwe winda kiriye bihayê herî bilind didin.
