Nehîr pale
Ji sala 2019`an heyanî 2026`an min jina ereb bi hemû ziraviyan şopand. Jina karker, cotkar, bermal, karmend, rêveber kesekî negot:`Nefes li min teng bûye`.
Sedem çi be jî hemû jinan dixwestin di sazî, tevgerên jin û bi Rêveberiya Xweser re bixebitin. Ew cara yekem bû projeyekê destûr dida jin bixebitê, têbikoşe û hebûna xwe diyar bike. Jin li wan herêman gihîştin asta bûn rêveberên sazî û navendan. Di hemû desteyên Rêveberiya Xweser de ciyê xwe di sîstema Hevserokatiyê de girtin. Li wê civakê gihîştina jin a asta ku bibe rêveber û civakê birêve bibe, firsetekî mezin bû.
Jinên hevjînên wan wefat dikin an jî ji hevjînên xwe cûda bûne, ji civakê kesek xwedî li wan dernakeve. Malbata bav jî tiştekî nade wan û xwedî li zarokên wan dernakevin. Tenê di nava sîstema Rêveberiya Xweser de dikarîbûn cî bigrin. Gihîştibûn asta sazî û meclisan birêve bibin. Ne tenê bi nav rêveber bûn, li hemberî mêr têdikoşiyan, êdî rê û rêbazên mêr li hemberî jinê lêpirsîn dikirin. Bi sedan li hevdû kom dibûn, pirsgirêkên jin dinirxandin û li çareseriyê digeriyan.
Sîstem bi ketina HTŞ`ê ya wan herêman hilweşiya. Jin dibêjin ew fetisîne û bê nefes mane. Her gaveke HTŞ`ê li kolanên Reqayê, çeteyên DAIŞ tîne bîra wan. Saet 07:00 sibehê heyanî saet 12:00 li dibistanên Reqayê ayetên Quranê datînin. Piştî wê heyanî nimêja eşayê saet 07:20 li mizgeftan berdewam dikin. Li hemû kolanên Reqayê quranê belav dikin. Mîna ev çend sal bûn her kes ji dînê Islamê dûrketiye û bûne kafir. Bi hemû gavên xwe re bibîrtînin ku Reqa berê paytexta DAIŞ`ê bû û êdî divê jin xwe bikşînin qilifê xwe û dernekevin. Balkêş nemînin ku saziyeke bi navê polîsên exlaqî çêbikin da ku jinan bişopîn in û wan ceza bikin.
Li bajarê Tebqa, Reqa û Dêra Zorê êdî wê sîstem û civak di bin navê adetan de hîn zêdetir êrîşî jinan bikin. Jinên ku di saziyên xweser ên jin û bi Rêveberiya Xweser re xebitîne, êdî wê bidin aliyekî. Di nava civakê de cî ji wan re nîne, sîstem jî wê her tim weke dijmin li wan binêr e.
Jin di dîrokê de gelek caran hatiye şikandin, niha jî li ser asta cîhanî sîstemên dagirker êrîşî jinê dikin. Li Rojava, Îran û Tirkiyê êrîşî şoreşa `Jin, Jiyan, Azadî` dikin. Di encama êrîşên HTŞ`ê jin li Tebqa, Reqa û Dêra Zorê şikestin. Jinên ku di asta rêxistinî, rêveberî, pîşeyî de gavên mezin avêtibûn, niha li ser hemûyan hat ferz kirin ku bibin hemşîre, mamoste, bermalî û dirûnker. Bi sedan ji wan bê karin û nikarin pêdiviyên xwe yên malbatî pêk bîn in.
HTŞ`ê xebatên jin li ser xwe xeter dît û bi van êrîşan re dawî li xebatên jinên Ereb anî. Ji ber vê yekê hemû xebatkarên jin ên Tebqa, Reqa û Dêra Zorê tengav bûne û dibêjin em dixeniq in. Gotina xeniqandin dema ku jin bikar tîne tê wateya ew bi saxî hatiye kuştin û destdirêjî rûmeta wê kirin e.
