Hêvî Keleş/ Qamişlo
Tevî rewşên dijwar ên ku Herêma Cezîrê tê re derbas bûye û barên xizmetguzariyê yên zêdebûyî yên ji ber alûziyên li pey hev, Şaredariya Gel a Qamişloyê erkên xwe yên rojane pêk tîne.
Di nav zehmetiyên xizmetguzariyê û zextên mirovî yên zêde de, Şaredariya Gel a Qamişlo wekî dabînkerê sereke yê xizmetguzariyê derketiye holê, herwiha ji bo parastina berdewamiya xizmetguzariyê û organîzekirina bersiva awarte ji bo kesên koçber dixebite.
Şaredariya Gel a bajarê Qamişlo tevî rewşên awarte yên ku herêma Cezîrê di van demên dawî de têre derbas dibe, tevî zextên aborî û yên têkildarî xizmetguzariyê yên zêde ku rasterast bandor li binesazî û kapasîteya xebitandinê ya saziyên xizmetguzariyê kirine, erkên xwe yên rojane yên xizmetguzariyê pêk tîne. Digel vê yekê, karê şaredariyê nesekiniye, berevajî vê, ew di çarçoveya çavkaniyên xwe yên berdest de, bi planên rêxistinî û bersivên rasterast ên meydanî ji bo dabînkirina hewcedariyên nişteciyan, di nav de kesên koçber jî, berdewam kiriye.
Xizmetên paqijiyê… karekî rojane û zehmetiyên berdewam
Paqijiya giştî yek ji mijarên herî girîng e ku Şaredariya Gel a Qamişloyê ji ber bandora wê ya rasterast li ser tenduristiya giştî û xweşikbûna bajêr dide pêş. Di vê çarçoveyê de, beşa paqijiyê ya şaredariyê rojane û bi rêkûpêk wesayîtên xwe yên paqijiyê dixebitîne, nemaze li kolanên sereke û li taxên qerebalix.
Kamyonên çopê rojê sê caran di kolanên sereke re derbas dibin, li gorî bernameyek pêşwext ku ji bo rêxistina berhevkirina çopê û kêmkirina kombûna wê li nişteciyan hatiye belavkirin. Şaredariyê herwiha kampanyayên hişyarkirinê li dar xistiye da ku nişteciyan li ser bernameyên kamyonan û girîngiya danîna çopê di demên diyarkirî de agahdar bike. Lêbelê, tevî van hewldanan, şaredarî bi pirsgirêkên zelal re rû bi rû ye, bi taybetî jî pabendbûna bi demên diyarkirî yên ji bo avêtina bermayiyan, ku dibe sedema kombûna wan li hin cihan piştî derbasbûna wesayîtên paqijiyê û bandorek neyînî li ser rewşa paqijiyê ya bajêr dike, ku asta hewldana li ser erdê nîşan nade.
Herwiha, nedayîna xercên paqijiyê ji aliyê hin niştecihan ve astengiyeke din li pêşiya pêşveçûna vê sektorê çêdike. Ji ber ku şaredarî ji bo dabînkirina lêçûnên sotemeniyê, lênêrîna wesayîtan û mûçeyên karmendan beşek ji van xercan dispêre ser xwe. Şaredarî tekez dike ku ev xerc li gorî xizmetên pêşkêşkirî beşdariyeke Biçûk temsîl dikin, lê ew ji bo misogerkirina berdewamî û baştirkirina van xizmetan girîng in.
Wekî beşek ji hewildanên ji bo baştirkirina xizmetguzariyan di nav stargehan de, atolyeya paqijiyê ya şaredariyê xebata xwe ya 24 saetan didomîne da ku hewcedariyên navendan bicîh bîne û kêmasiyên teknîkî çareser bike. Ev yek sererastkirina astengiyan, parastina xetên avdanê û çareserkirina her pirsgirêkek ku dikare ji bo niştecihan xetereyek tenduristiyê çêbike vedihewîne. Şaredarî tekez dike ku tîmên paqijiyê piştî wergirtina her raporek mudaxele dikin, ji ber xwezaya hesas a rewşê di nav stargehan de û pêwîstiya parastina jîngehek saxlem û ewle, nemaze ji bo zarok û extiyaran.
Bersiva bilez ji bo krîza koçberiyê
Digel pêlên koçberiyê yên ku li herêmê belav bûn, Şaredariya Gel a QamIşloyê ji saetên pêşîn ên aloziyê ve bi lez tevgeriya, mezinbûna berpirsiyariya xwe ya mirovî nas kir. Wê komîteyek taybetî û şaneyek krîzê ava kir da ku zû amade bibin û bersivê bidin hewcedariyên rojane yên koçberan.
Şaneya krîzê ji bo hevrêzkirina di navbera beşên cûda yên şaredariyê de xebitî da ku dabînkirina xizmetên bingehîn di nav stargehan de misoger bike û ji bo derbaskirina zehmetiyên ku mirovên bêwar dikarin rastî wan werin, nemaze ji ber hejmara mezin û şert û mercên dijwar yên jiyanê.
Av… di stargehan de pêşîniyek sereke ye
Yek ji pirsgirêkên herî girîng ên ku ji hêla şaneya krîzê ve hatî çareser kirin, dabînkirina avê bû, ji ber girîngiya wê ya jiyanî ji bo parastina tenduristiya giştî. Şaredariyê dabînkirina avê ya domdar ji bo stargehan misoger kir, li gorî bernameyek rojane ku hejmara niştecihên her navendê li ber çavan digirt.
Hewldan bi tenê dabînkirina avê sînordar nebûn, Şaredariya Gel ji bo hin stargehan depoyên avê yên nû jî kirî da ku depoya têr peyda bike û pêşî li kêmasiyên bigire. Wekî din, xebat ji bo parastina torên paqijiyê yên di nav navendan de, danîna lûleyên nû û dabînkirina pêdiviyên pêwîst ji bo garantîkirina gihîştina avê ya ewle û pêbawer hate kirin.
Pirsgirêk û girêdayîbûna bi hevkariya civakî
Tevî hemû hewldanên ku hatine kirin, Şaredariya Gel a Qamişlo mezinahiya pirsgirêkên ku pê re rû bi rû ye, çi ji aliyê kêmbûna çavkaniyan ve be, çi jî ji aliyê zexta mezin a li ser xizmetguzariyan ve ji ber zêdebûna nifûsê piştî pêla koçberiyê ya dawî ji Reqa û Tebqayê ber bi herêma Cezîrê ve, venaşêre. Lêbelê, şaredarî tekez dike ku serkeftina pêşkêşkirina xizmetguzariyan ne tenê bi saziyan ve girêdayî ye, lê di heman demê de hevkariyek rastîn ji civakê jî hewce dike.
Di vê çarçoveyê de, şaredarî bang li niştecihan dike ku pabendî bernameya avêtina bermayiyan bibin, paqijiya giştî biparêzin û xerca paqijiyê bidin, ji ber ku ev beşek ji berpirsiyariya hevpar e ku beşdarî baştirkirina rewşa giştî ya xizmetguzariyê ya bajêr dibe. Bi van hewildanên berdewam, Şaredariya Gel a Qamişloyê pabendbûna xwe ya bi bicihanîna erkên xizmetguzarî û mirovî, tevî hemû şert û mercan û zehmetiyan, piştrast dike. Armanca wê ya sereke parastina rûmeta mirovan û dabînkirina jîngehek paqij û saxlem ji bo hem niştecihên bajêr û hem jî ji bo koçberên ku li Qamişloyê, dimîne.
