Solîn Mihemed/ Qamişlo
TEV- ÇAND, Tevgera Hîlala Zêrîn, Desteya Çand û Ronakbîrî, Meclîsa Wêje û Yekîtiya Hunermendan ji bo piştgiriya berxwedaniya tevahî hunermendan li şoreşa Rojavayê Kurdistanê daxuyaniyek dan.
Ji bo piştgiriya berxwedaniya tevahî hunermendan li Şoreşa Rojavayê Kurdistanê TEV- ÇAND, Tevgera Hîlala Zêrîn, Desteya Çand û Ronakbîrî, Meclîsa Wêje û Yekîtiya Hunermendan li pêşiya navenda Mihemed Şêxo ya li bajarê Qamişlo daxuyaniyek dan. Herwiha daxuyanî ji aliyê kordinasyona Hîlala Zêrîn a Rojava Şêrîn Reşîd ve bi zimanê Kurdî hat xwendin.
Naveroka daxuyaniyê wiha bû: “Weke tê zanîn, ev qonaxa me derbas kir û hîna bi gelek divêtiya ve dagirtî ye, ne tenê qonaxeke eniyên şer û çek, herwiha qonaxek exlaqê mirovatiyê, wijdan û huner tê de tê ezmûnkirin û wê bê ezmûnkirin. Têkoşîna li Rojavayê Kurdistanê hatî meşandin û hêjî didome, ji berxwedaneke leşkerî û polîtîka wirdetire û îfadeyeke rojane ya gelê Kurd e. Di xwedîderketina gel û vîna ku li Rojavayê Kurdistanê derkete holê de, rola ku hunermendên Kurd lîstî ne roleke duyemîn bû, roleke dîrokî, sereke û pêşengtiyê bû.
Ev sekn û helwesta hunermendên Kurd ne nû ye. Ji Ayaz û Erdelanan bigire heta Hozan Sefkan, Hozan Mîzgin, Hozan Serhat, Sarya Baran, Xelîl Dağ, Delîla, Sîpan, Berçem û Bavê Teyar û bi sedan hunermendên Kurd ên li çar parçeyên Kurdistanê, li hemberî înkar, qirkirin û zilma li ser gelê Kurd tê meşandin, xeta hunera rast bi pîvanên etîk û estetîk di seknên xwe de diyar kirine û danîne holê.
Sekna hunermendên Kurd a îro li derdora têkoşîna li Rojavayê Kurdistanê derketî holê jî berdewamiya vê xeta berxwedanê ye. Li gel hunermendên li Rojavayê Kurdistanê, bi sedan hunermendên Kurd li her çar parçeyên Kurdistanê û derveyî welat, ne tenê bi berhemên xwe, di meş û çalakiyên piştgiriyê de li kolanan li kêleka gelê xwe cih girtin û pêşengtî kirin. Bi vê boneyê huner ji qadên ewle derxistin; li hemberî zilmê huner vegerandin têkoşîn û berxwedanek bi beden, deng, vîn, berpirsyartî û wijdanî.
Di berdewamiya daxuyaniyê de wiha hat gotin” Li Rojavayê Kurdistanê gelek hunermendan ji bo parastina xak û rûmeta gelê xwe enstûrmanên xwe danîn, dest avêtin çekan, ji bo bergiriya êrîşên hovane yên li ser gelê Kurd hatin meşandin, çûn eniyên şer. Ev ne nakokiyeke bi hunerê û sekna hunermendan re. Nîşaneya wê rastiyê ye ku, ka li ser van axan hunera rast çawa tê kirin. Ji ber li ser vê axê huner ji jiyanê ne qut e; awayekî parastina jiyanê bi xwe ye.
Lewma divê sekna hunermendên Kurd a bi têkoşîna li Rojavayê Kurdstanê û çalakiyên xwedîderketina li vê têkoşînê re derketî holê ne tenê weke bijartekek estetîk, divê weke sekneke exlaqî û dîrokî bê dîtin. Ev sekneke. Cihê xwe û rola xwe ya di têkoşîna azadiyê de diyar kirin e. Ji ber di demên wisa dîrokî de an wê hunermend bi bêdengiya xwe xizmetê ji zalim û desthilatdaran re bikin, an jî wê bibin bîr û hişê civaka xwe ya li hemberî her cure serdestî û zilmê têdikoşin. Ji ber sekna wan a bi exlaq û wijdanî, helwesta wan a zana û şiyar, têkoşîna wan a hêjayî pîvanên mirovbûn û jiyana azad, em spasiya hemû hunermendên Kurd ên di vê qonaxê de mil bi milê gelê xwe di qadên têkoşînê cih girtin û rola pêşengiyê lîstîn dikin.
Daxuyani wiha bi dawî bû” Li welatê me huner awayekî berxwedanê ye. Di vê dema têkoşînê ya hebûn, maf, azadî û xwebûnê ya gelê Kurd de, dîsa erk û berpirsyartiyên mezin dikevin ser milên hunermendan. Dibe ku cara yekê be li derdora têkoşîna li Rojavayê Kurdistanê gelê Kurd di bîr û bawerî, zanebûn, sekin, vîn û giyan, helwest û têkoşîna xwe de evqas bû yek û sînorên çêkirî bi helwesta xwe ya netewî parçe û bê wate kir. Divê hunermendên Kurd bi berhemên xwe bikarin vê rastiya dîrokî, daneheva ku dikare rêya bi destxistina hemû mafên gelê me veke vegerînin berhemên mezin, di hevgirtin, yek kirin û xurtkirina têkoşîna azadiyê de bi her awayî rola xwe ya pêşengiyê ji vir û şûn ve jî bidomînin. Ev rol û berpirsyartiyek dîrokî, qedirbilind û pîroz e.
Li ser vî bingehî em bang li hemû hunermendên Kurd dikin ku, li gorî sekn û pîvanên welatperweriya rast ên Bavê Teyar danîn holê, li her qada lê ne bi vê berpirsyariyê tevbigerin; ji bo Netewa Demokratîk û yekîtiya netewî rola xwe ya pêşengiyê ji her demê xurtir bilîzin û bikarin bi hunera xwe bibin dengê gelê Kurdistanê.”
