Solîn Mihemed /Qamişlo
Rêveberiya Nexweşxaneya Gel a Qamişlo Meyîsa Meter diyar kir ku ew di hemû warî de û ji bona dermankirina koçberên nexweş dibin alîkar.
Nexweşxaneya Gel a Qamişlo ew jî di vê rewşê de bûye yek ji rêxistinan ku alîkariya koçberan û dermankirina wan û ji hemû milî ve alîkarî pêşkêşkirin. Di heman demê de Nexweşxana Gel a Qamişlo gelek beş aktîv kirine ji bo hemû cureyên nexweşiyên koçberan û niha jî beşekî kilînkê yê niştekariyê jî tê aktîf kirin.
Di derbarê mijarê de Rêveberiya Nexweşxaneya Gel a Qamişlo Meyîsa Meter ji Rojnameya me re axivî.
‘Me ji bo nexweşiyên koçberan beşek ji kilînkê aktîv kiriye’
Meyîsa di destpêka axaftina xwe de bal kişand li ser nexweşiyên koçberan û wiha got: “Ji xwe Nexweşxaneya Gel a Qamişlo hîna ji nûve beşên xwe temam dikir, ji ber vê yekê me hîna gelek beşên xwe amade nekiribûn. Herwiha ji ber rewşa awarte ya ku derketî holê jî gelek birîndar hatin nexweşxaneyê, lê belê me ji bo vê rewşê beşek ji birîndaran re hate amedekirin. Ji ber seqem û sermaya dijwar gelek koçber ku piraniya wan zarok û jin bûn nexweş ketin û ji bona dermankirina wan ji hemû milî ve em ketin nava liv û tevgerê û em bi wan re alîkar bûn. Di heman demê de beşek di neweşxaneyê de ji bo nexweşiyên zarok û jinan hate amedekirin.”
‘Wê Beşek di nexweşxaneyê de girêdayî niştekariyê aktîv bibe’
Meyîsa Meter anî ziman ku beşekî kilînkê yê niştekariyê wê aktîv bibe û wiha berdewam kir: “Niha beşekî kilînkê yê niştekariyê wê aktîv bibe ji bo rewşên awarte. Ji ber nexweşiyên koçberan gelek bûn, dermanên me kêm derketin û niha jî derman ji me re pêwistin. Herwiha dermanên ku niha li ba me tune ne jî dermanên zarokan e. Beşê me yê ku kêmasî ketiyê, yê şuştina gurçikan bû, ji ber ku hejmareke baş ji koçberan hebûn. Nexweşiyên ku niha tên bêtir nexweşiyên girîpê û nexweşiyên çermî yên dest û ling ku ji ber sermayê bi wan re derdikevin.”
‘Gelek derman ji nexweşxaneyê kêmin’
Meyîsa da xuyakirin ku gelek derman ji nexweşxaneyê kêmin û wiha bidawî kir: “Rewşa koçberan ji aliyê nexweşiyan ve pir zehmete, ji ber ku gelek ji wan nexweşiyên şekir, dil û çav bi wan re hene û heya ku ji destê me tê em ê alîkariya wan bikin. Dermanên ku li ba me hebûn kêmin û em astengiyan ji vî milî ve jiyan dikin. Ji xwe zehemetiyên ku di destpêkê de bi me re çêdibûn, ew bû ku hîn nexweşxane nehatibû amedekirin û gelek derman kêmin. Ji ber vê me hewilda bi gelek saziyên eleqedar û bi taybet jî heyva sor a kurd re peywendî deyînin ji bona dabînkirina dermanan ji bona nexweşxaneya gel ya Qamişlo.
