Solîn Mihemed/ Qamişlo
Endamên Meclisa Malbatên Şehîdan ya kantona Cizîrê dan diyarkirin ku komên çeteyan û dewleta Tirk bi dagirkirina her herêmekê re goristanên şehîdan wêran dikin û gotin, “Wêrankirina goristanên şehîdan kiryareke dijmirovî ye.”
Dewleta Tirk a dagirker, çeteyên girêdayî wê û çeteyên hikumeta demikî ya Sûriyê dema ku her herêmekê dagir dikin yekser berê xwe didin goristanê şehîdan û wêran dikin. Ji destpêka dagirkirina Efrînê ve û heta niha kiryarên çeteyan û bêhurmetiya wan li dijî goristanên şehîdan û cihên pîroz dewam dikin û bi dehan goristan li ser destê van çeteyên hov hatine wêrankirin.
Di derbarê mijarê de rêveberên Meclisa Malbatên Şehîdan a kantona Cizîrê Masûm Hesen û Armanc Mihemed ji Rojnameya me re axivîn.
‘Kiryarên çeteyan derveyî exlaq û pîvanên mirovahiyê ne’
Mehsûm diyar kir ku kiryarên çeteyan derveyî exlaq û pîvanên mirovahiyê ne û wiha got: “Ev çeteyên ku roj bi roj şerê me dikin kesine derveyî exlaq û pîvanên mirovahiyê ne. Di şer de pîvanên exlaqî hene, lê ev çeteyên ku şerê me dikin li dijî gelê Kurd kiryarên dijmirovî dikin. Herwiha hedef û armanca van çeteyan qirkirina gelê Kurd e. Ew heta bêhurmetiyê li dijî şehîdan jî dikin, heta ji goristanê şehîdan ditirsin. Çete dema cihekî Kurdan dagir dikin yekser berê xwe didin goristanê şehîdan û wan wêran dikin. Ji xwe ev yek li Efrîn, Şehba, Minbic, Serêkaniyê û Til Ebiyed û gelek deverên din li ber çavan hate kirin. Rastiya hovîtiya ku tê meşandin ji bo hemû gelên cîhanê işkere bû û rastiya van hêzên çete weke her car hate naskirin. Armanca çeteyên hov û dewleta tirk ew e ku li ser gelê kurd komkujiyan pêkbînin û vîna gelê kurd bişkînin.
‘Pêwîste kes û aliyên kiryarên dijmirovî dane meşandin werin dadgehkirin‘
Mehsûm Hesen da zanîn ku pêwîst e çete û aliyên ku piştgirî dan wan bên cezakirin. Herwiha îro Rojava şensekî mezine ji bona me û eger di Rojava de em li ber xwe nedin, wê xeterî li ser Bakur, Başûr û Rojhilat jî çêbibe. Ji xwe me dît di mînaka Şêxmeqsûd de ku çawa Kurdên herçar parçên Kurdistanê hemû bi yek dengî piştgiriya berxwedana Şêxmeqsûd û Eşrefiyê kirin. Ji ber vaqas tiştan jî gelê me heya dawiyê wê li ber xwe bide û wê xwedî li civaka xwe û şehîdên xwe jî derkevê.”
Heyanî neha sazî û yekîtiya mafê mirovan tiştek ji bona gelê Kurd nekiriye
Armanc Mihemed di destpêka axaftina xwe de bal kişand li ser 10’ê Adarê û wiha got: “Ev êrîşên hovane yên ku li ser asta Bakur û Rojhilatê Sûriyê tên dûbarekirin û domandin armanca wan qirkirina gelê Kurde û tunekirina destkeftiyê gelê Kurd e. Li mehberî van êrîşên hovane yên ku li ser gelê Kurd têne kirin, em bang li cîhanê tevahî dikin ku ji bona parastina gelê kurd bikevin nava liv û tevgerê de û van êrîşên hovane yên ku têne meşandin rawestînin.
Ji bona vê yekê pêwîste ku cîhan tev bi erkê xwe rabe û li gel gelê kurd bisekne û destekê bide doz û vîna wî ya ji bona pêkanîna azadî û demukrasiyê.
Ji milekî komkujiyan li ser gel pêktînin û ji milekî din ve jî kesên ku şehîd dikevin jî ji hovîtiya wan xilas nabin, ji br ku ew êrişî goristanan jî dikin.
Ji ber vê jî Xirakirina goristanên şehîdan bê pîvaniya exlaqî ye û çeteyên heyî tu par ji mirovahiyê negirtine û pêwîste ku di nava dadgehên navnetewî de ji ber van kiryaran werin dadgehkirin. Banga me jî wek Meclisa Malbatên Şehîdan ew e ku em xwedî li nirxê şehîdên xwe derkevin û destkeftiyên ku bi xwînê pêkhatine biparêzin.
