Ronahî Sadûn/ Hesekê
Bi pêşengiya Kongra Star li ser asta Cizîrê li Parka 4’ê Nîsanê ya bajarê Hesekê mîtingek girseyî bi armanca rawestandina êrişên li ser Rojavayê Kurdistanê, rakirina dorpêça li ser bajarê Kobanê, bidawîkirina komkujiyan û qirkirina li ser gelê Kurd, hat lidarxistin.
Kongra Star û tevgerên jin li ser asta Cizîrê li Parka 4’ê Nîsanê ya bajarê Hesekê mîtingek girseyî bi armanca rawestandina êrişên ku ji 6′ Çileyê ve li ser her du taxên Şêxmeqsûd û Eşrefiyê yên Helebê hat destpêkirin û pêre heya roja îro li ser Rojavayê Kurdistanê berdewam dike, lidar xist. Jinan di mîtingê de bang kirin ku şer bê rawestandin û bidawî bibe, komkujî pêk neyên û qirkirina gelê Kurd neyê kirin.
Di destpêka mîtingê de hemû jin deqeyeke rêzgirtin li ser giyanên cangoriyên azadiyê rawestiyan. Piştre li ser navê Koordînasyona Kongra Star a Rojava Jiyan Hisên axivî.
Jiyan Hisên di destpêka axaftina xwe de tekez kir ku ew silogana ku wan pê dest pê kiriye “Berxwedan Jiyane” wê ev silogan her bimîne û wiha got: “Ji Cizîra serhildêr heya Kobana berxwedêr em silavên xwe pêşkêşî gelê xwe, bi taybet gelê Kobanê ku heya vê kêliyê bê navber têkoşîn dike, dikin. Herwiha em di şexsê şehîd Salîhe ku yek ji pêşengên Şoreşa Rojava û endama Koordînasyona Kongra Star e ku îro salvegera şehadeta wê ye, di heman demê de di şexsê şehîd Denîz Heleb û Arîn Mîrkan em tevahî şehîdên azadiyê bi bîr tînin. Niha ji 6’ Çileya 2026’an ve heya roja îro bê navber, komployeke navnetewî derheqê gelê Rojavayê Kurdistanê tê meşandin. Lê gelê Rojavayê Kurdistanê û tevahî Kurdistanê bi şervan, gel, ciwan, jin û zarokê xwe, êdî her kes ev komplo nas kir ku ev komplo ya navnetewî û heman wextê herêmî ye. Lê îro roj gel û şervanên me di eynî mewziyê de ne, ji bo wê em ê karibin vê komployê vala derbixin. Ya din em dibînin çawa êrişî Kobanê dikin, dîroka tu kesî nayê jibîrkirin ku Kobanê 2014’an li beramberî hêzeke tarî, bû keleha berxwedanê û DAIŞ’ têk bir, lewra ev hêzên terorist ku HTS’ê û dewleta Tirk wê birêve dibe dixwazin tola DAIŞ li Kobanê rake, lewma êrişeke pir dijwar û dorpêçeke giran li ser gelê me yê Kobanê dide meşandin. Lê gelê Kobanê di salvegera rizgarkirina Kobanê de, dîsa ew mesaj dan û gotin; “Em hene û em ê hebin, nahêlin Kobanê bikeve û nahêlin tarîtiya DAIŞ’ê dîsa bikeve Kobanê.” Ji bo wê têkoşîna me wê her berdewam be.”
Mîting bi gerandina dîlanê û qîrkirina siloganên “Bijî yekîtiya gelê Kurd” “Bijî berxwedana Kobanê” “Jin, Jiyan, Azadî” “Bijî berxwedana YPG û YPJ’ê hat bidawîkirin.
