Navenda nûçeyan
Hêzên Ewlekariya Şêxmeqsud bi daxuyaniyekê ragihand ku hêzên wan heta dawiyê parastina gel û rûmetê kirine, ji bo veguhestina şehîd, birîndar, jin û zarokan agibestek qismî hatiye îlankirin. Hêzên Ewlekariyê destnîşan kir ku ewê bi rê û rêbazên cuda têkoşîna xwe bidomînin.
Hêzên Ewlekariya Şêxmeqsûd derbarê geşedanên dawî yên li taxê û veguhestina şehîd, birîndar, jin û zarokan de, daxuyaniyek nivîskî belav kir.
Daxuyanî wiha ye:
“Ji roja 6’ê Çileya 2026’an ve çeteyên girêdayî Hikûmeta Demkî ya Şamê, bi piştgiriya balafirên keşfê yên dewleta Tirk, bi tank, top, wesayîtên zirxî û hemû cûre çekên giran, tevî hezaran çeteyan li dijî taxa me dest bi êrişeke hovane kirin.
Bi van êrişan dihat armanckirin ku gelê me yê taxê di qirkirinê re bê derbaskirin, demografiya taxê bê guhertin û rûmeta gelê me bişikînin.
Lê belê hêzên me li ser biryara Meclîsa Gel a Taxên Şêxmeqsûd û Eşrefiyê birdariya berxwedanê û parastina rûmeta xwe nîşan da.
Li ser vê yekê berxwedaniyeke fedaîyane hate nîşandan, hêzên me bê tereddût ji bo parastina taxê û rûmeta gelê me canê xwe feda kirin. Bi tu awayî serî nehat tewandin û teslîmiyet nehate qebûlkirin. Wê agahiyên derbarê nasnameya şehîdan de jî bi raya giştî re werin parvekirin.
Di vê pêvajoya şer de gelê me yê ku rastî êrişên dijwar hat, gelek birîndar û şehîd dan. Ji bo dermankirina birîndaran li tekane nexweşxaneya taxê ya bi navê Nexweşxaneya Xalid Fecir kombûn çêbû. Çeteyan bi dehan caran bi çekên giran, her weha bi balafirên tîpa Bayraktar ên dewleta Tirk êrişî vê nexweşxaneyê kirin û hewil dan komkujiyê pêk bînin.
Herî dawî ji bo ku rê li ber komkûjiyê were girtin û birîndar, sivîl, jin û zarok ji nexweşxaneyê werin derxistin û bi selametî derbasî qadên bi ewle werin kirin, agirbestekî qismî hat ragihandin. Hêzên me bi hessasiyeteke mezin nêzêkî agirbestê bûn û Nexweşxaneya Xalid El Fecir hate valakirin.
Hêzên me, wê ji vir û şûn de jî ji bo parastina îradeya azad a gelê xwe û rûmeta xwe, heta dawiyê li ser şopa şehîdên xwe bê teredût li ber xwe bide. Wê bi rê û rêbazên cûda têkoşîn û berxwedana hêzên me berdewam bike.”
