Zarîn Kobanê
Şehîd Sara ji berê de ji bo me her serkêş û pêşeng e. Hevrê û xwedawend Sara Dêrsim (Sakîne Cansiz) fermandar û rêzaneke muezem bû. Bajarê Dêrsimê cih û warê berxwedêrên weke Seyîd Riza, Elîşêr, Besê û Zerîfeyan e. Her wiha warê pêşengên Tevgera Apoyî Mazlûm, Delîl, Fûad û Bêrîtanan e. Hevala Sara mînaka berxwedêriya wan leheng û serkêşan bû.
Rêveber û çalakvan hevrê Sara Dêrsim hemû temenê xwe di nav têkoşînê de derbas kir. Her serbilind asî û rûken bû. Fermandara me Sara bi wêrekî, ji dil û can, bi bîr û bawerî erka xwe ya dîrokî ya ji bo azadiya gelan û jinan pêk anî. Her hewl dida ji jinên êşkişandî re bibe bersiv. Ji zindanan heya çiya û her qadên têkoşînê bi heybet û sekna xwe ya berxwedêr hat naskirin.
Xwedawend Sara Dêrsim li zindana Amedê tif li rûyê nûnerê cûntaya faşîst a 12’ê Îlonê kir. Qehreman Sara weke jineke asî û serhildêr li ber xwe da, têkoşîn kir. Li hember neheqiyan bû dengê berxwedanê. Qet serê xwe ji zilmê re netewand. Timî bi serbilindî jiya û têkoşîn kir. Weke di pirtûka xwe de jî diyar dike jiyana wê her tim şer bû. Şerekî ji bo parastina rûmet û kerameta mirovahiyê bû.
Hevrê Sara weke yek ji pêşenga Koma Apoyî bi bîr û baweriyeke mezin di nav kar û xebatên şoreşa Kurdistanê de cih girt. Bi sedan ciwan perwerde kirin. evîndara gelan heval Sara ji bo jiyaneke bê zilm û bêzext diyarî zarokên Kurdistanî bike şer kir, têkoşîn pêş xist.
Ez careke din xwedawend û serkêşa xwe Sara Dêrsim, bi rêzdarî bi bîr tînim û bejna xwe li hemberî bîranîna wê ditewînim. Em soz didin hedef û armanca tevahî pakrewanên xwe pêk bînin û têkoşîneke layiqî wan bimeşînin.
