25’ê Hezîranê de emê jiyaneke nû ava bikin

Hevserokê HDP’ê Sezaî Temellî diyar kir ku 24’ê Hezîranê têkçûna AKP-MHP’ê wê aştiyê hêsan bike û bang kir ku her kes li HDP’ê û sindoqan xwedî derkeve.
Hevserokê Giştî yê Partiya Demokratîk a Gelan HDP’ê Sezaî Temellî çû Amedê. Temellî serdana parlamenterên HDP’ê, namzetan kir û çû Meclîsa Dayikên Aştiyê ya li Baxlarê. Temellî li wir li ser hilbijartinê û têkoşîna aştiyê axivî.
BÊ DEMOKRASIYÊ
AŞTÎ NABE
Temellî diyar kir wan xebatên xwe li ser têkoşîna aştî û demokrasiye dane rûniştin û got, “Me got heta ku demokrasî neyê vî welatî aştî nabe. Ji bo me pir girîng e ku me serdana Dayikên Aştiyê kir, ku xwe xistine bin barê aştiyê û dengê aştiyê gur dikin.”
EM DESTHILATIYA ŞER RAWESTÎNIN
Temellî da zanîn ku Dayikên Aştiyê bi salan e ji bo aşitî were têdikoşin, berdêlên ku dayikan dayin bi bîr xist, Dayika Taybet mînak da û got, “Li vir em dixwazin destpêkekê bikin, em dixwazin bi Dayikên Aştiyê re vê bangê bikin. Encex em dikarin dawî li polîtîka û hişmendiya şer bînin. Em dikarin rê li ber bigirin ku careke din ev nebin. Werin em li vir ji vê desthilatdariyê re, ku bi polîtîkayên şer dimeşe, bibêjin, êdî bes e. Dayikên Aştiyê tim li pêş bûn di vê têkoşînê de, ji bo ku ev şer û zilm raweste tim dengê xwe rakirin.” Temellî wiha domand, “Ji 24’ê Hezîranê re hindik ma, em ê biçin ser sendoqê û li aştî, li vîna xwe xwedî derkevin. 25’ê Hezîranê ji bo ku ev êş dîsa neyên jiyîn, em ê jiyanê bi hev re ava bikin.”
GELÊ ME WÊ LI SINDOQAN XWEDÎ DERKEVE
Temellî li ser pirsa nûçegihanan a têkildarî biryara YSK’ê ya li ser veguhaztina sindoqan got, “Dixwazin HDP’ê di bin bendê de bihêlin. Hemû gelê me, hilbijêr wê biçin ser sendoqê û li deng û vîna xwe xwedî derkeve. Çi jî bikin em ê li ser sendoqên xwe bin.”
EWLEHIYA SINDOQÊ
LI SER HDP MAYE
Temellî got ewlehiya sindoqan dewlet distîne lê niha ewlehiya sendoqan li ser HDP’ê û partiyên din maye û wiha dewam kir, “Astenga mezin a li pêş dayina dengan a bi rengekî ewle, dewlet e. 250 hezar hevalên me wê bixebitin. Platforma Hilbiljartinê ya Dadmend avabûna xwe ragihand û em di nav vê de ne. Li her derê her kes wê li sindoqê û dengê xwe xwedî derbikeve.”