Hêvî Keleş/ Qamişlo
Hunermenda Kurd Laçîn Ibrahîm destnîşan kir ku çanda kurdî ya devkî, beşeke bingehîn e ku bi saya hezkirî, hunermend û stranbêjan derbasî nifşên din dibe û wiha got: “Ez bi muzîkê dijîm.”
Gelek hunermendên Kurd mîras û çanda gelê Kurd bi stranbêjiyê parastin. Û di parastina çand, huner û nirxê gelê kurd de hunermend, tembûrvan û stranbêjên ciwan ên Kurd rolek mezin lîstin e. Ciwanên kurd ji bo parastina mîrata çandî ya kurdî kedeke mezin dane. Di heman demê de li Rojavayê Kurdistanê bi Hunermendên xwe yên ciwan dewlemend e û bi taybet jin, zarok û ciwan, yek ji wan jî hunermend Laçîn Ibarhîm e.
Kurtejiyana hunermenda Kurd Laçîn Ibrahîm
Laçîn Ibrahîm di 15’ê Tebaxa sala 2002”an de li gundê Çeqela a navçeya Cindirês hatiye jiyanê. Ew di temenkî biçûk de ji dev dibistanê berdaye û bi muzîkê mijûl bûye. Wê Peymangeha Ariya a Akadimî xwendiye û fêrî lêdana Tembûr û Gîtarê bûye. Berhemek wê bi navê (Dilê min diyarî ji bo te ye) û di 2016”an de wê xelata yekemîm bir di fastîvala hawar de li bajarê Efrînê.
Derbarê jiyan û hunera xwe de Hunermenda Kurd Laçîn Ibrahîm ji Rojnameya me re axivî.
‘Ji temenê 6 salî ve dest bi stranbêjiyê kir’
Hunermend Laçîn Ibrahîm anî ziman ku wê ji temenê 6 salî ve dest bi stranbêjiyê kir û wiha got: “Min ji zaroktiya
xwe de li dibistanê li gel hevalên xwe herdem distira. Yê ku destek da min û piştgiriya min kir û hişt ku ez bi stranbêjiyê mijûl bibim bavê min bû, wî dît ku ez ji muzîkê hez dikim û jêhatiya min tê de heye. Bavê min hertim moralê min bilind dikir û baweriya wî bi min û dengê min hebû û ji bo wî min ev rê temam kir, bavê min jî tembûrvaneke û ji muzîkê hezdike ji ber wê piştgiriya min kir. Gelek kes ji malbata min bi hunerê mijûl bûne, ji ber wê min jî ji hunerê û muzîkê hezkir.”
‘Ji bo min muzîk jiyan û hezkirin e’
Hunermend Laçîn Ibrahîm axaftina xwe wiha qedand û got: “Mirov dikare bi stranbêjiyê hestên xwe bîne ser ziman û parve bike, herwiha stranbêjî ji bo min cihê rehetiyê ye û aramiyê ye. Stranbêjî ji bo min jiyan û hezkirine, kêfxweşî û zordariyên ku di jiyanê de çêdibin, ez dikarim bi riya muzîkê û stranbêjiyê derxim holê. Daxwez û banga min heye ku li hemû ciwan û nifişên nû yên ku dikevin karê hunerê, ku li ser vê riyê bi awayeke cuda û taybet temam bikin ûbal li ser sitranên filiklorê bikşînin ji ber ku filklor namire her dem em wek nifişên nû pêwîste ku em bi awayekî xweş zindî bihêlin, herwiha bang li hunermendan dikim ku çanda xwe biparêzin û ragihînin nifşên nû.”
