Navenda Nûçeyan
Çalakvanên Îranî di Kongreya NADA de axivîn û tekez kirin ku jin di xeta berxwedana herêmî de yekgirtî ne û gotin, “Bi bandora serhildana Jin Jiyan Azadî, jinên Îranî niha bi perspektîfek vekirîtir û gerdûnî nêzî têkoşînê dibin.”
Hevgirtina Jinên Demokratîk a Herêmî ji bo Rojhilata Navîn û Bakurê Afrîkayê (NADA) li Silêmanî ya Başûrê Kurdistanê, bi dirûşmeya “Bi Şoreşa Jinan Ber bi Civakeke Demokratîk ve” û beşdariya 200 delegeyên ji 19 welatên cuda, 1emîn kongreya xwe li dar dixe. Di roja xwe ya duyemîn de, çalakvana siyasî Mehdiye Mîrhabîbî û endama Konseya Platforma Demokratîk a Îranê Besî Şemerî derbarê têkoşîna jinan de ji ajansa me re nirxandin kirin.
Mehdiye Mîrhabîbî: NADA hêviyek e ku ji sînoran wêdetir e
Mehdiye Mîrhabîbî diyar kir ku kongre dîrokî ye û got ku NADA hêviyek e ku wêdetirî sînoran e. Mehdiye Mîrhabîbî li ser bandora serhildana “Jin jiyana azad” a li Îranê dest pê kir axivî û got, “Ev hevgirtin ji perspektîfeke siyasî û civakî ve pir girîng e ji ber ku şîdeta li ser bingeha zayendî ya ji ber şer û wêrankirinê li van herêman zêde dibe.”
Mehdiye Mîrhabîbî tekez kir ku jinên Îranî ji perspektîfek gerdûnîtir nêzî têkoşînê dibin û got, “Êdî ne mimkûn e ku tenê di nav sînorên Îranê de guhertin were xwestin. Beşdarbûna di tevgerên herêmî û navneteweyî de îro bûye pêdivîyek.”
Besî Şamarî: Divê jin di pêvajoyên guhertina herêmî de rolên bi bandor bilîzin
Endama Konseya Platforma Demokratîk a Îranê Besî Şamarî, diyar kir ku kongre dikare bibe xala destpêkê ya yekîtiyek mayînde û got, “Ez hêvî dikim ku di pêşerojê de, NADA dikare jinên çalak ji neteweyên cûda di nav xwe de bigire. Divê jin di pêvajoyên guhertina herêmî de rolên bi bandor bilîzin. Piştî daxuyaniya dîrokî ya Birêz Ocalan a li ser bidawîbûna şer di 27’ê Sibatê de, di têkoşîna azadiyê de asoyek nû vebû; xala destpêkê ya vê asoyê azadiya jinan e.”
Besî Şamarî tekez kir ku tevgerên jinan bi hev ve girêdayî ne û axaftina xwe bi van gotinan domand: “Hemû tevgerên ku ji hêla jinan ve têne rêvebirin mîna xelekên zincîrekê bi hev ve girêdayî ne. Ev kongre dikare ji bo jinên li Îranê yên ku azadiyê dixwazin modelek piçûk lê zindî be. Îran welatek e ku xwedî asteke bilind a cihêrengiya etnîkî û çandî ye, û jin bi salan e li vir bi zilm û cudakariyê re rû bi rû ne.”
Serhildana ‘Jin Jiyan Azadî’ şoreşeke zîhniyetê ye
Besî Şamarî serhildana “Jin jiyana azadî” wekî şoreşek zîhniyetê bi nav kir û destnîşan kir ku serhildan ber bi sala xwe ya sêyemîn ve diçe. Besî Şamarî got, “Her kes dizane ku dengê jinên li Îranê yên ku azadiyê dixwazin çawa gihîştiye cîhanê. Niha dem hatiye ku ev deng di nav hevpeymaniyên sazûmanî û cidî de laşek bibîne.”
Besî Şamarî bertek nîşanî girtina çalakvanên têkoşîna jinan da û got, “Zeynep Celaliyan, Pexşan Ezîzî û Werîşe Muradî bûn dengê jinan. Ew ne tenê kes in; ew hilgirên manîfestoyekê ne, îdeolojiyeke gerdûnî ne ji bo azadiya jinan.
Li cihê ku behsa azadiya jinê tê kirin bila ala Zeynep Celaliyan, Pexşan Ezîzî û Werîşe Muradî li ba bibe. Ev ne tenê nîşanek rêzgirtinê ye, lê di heman demê de pêdiviya me bi modelek e ku tevgera jinan kurevî bike. Ev tevger êdî ne tenê berxwedaneke herêmî ye, ew dengê hemû jinên bindest ên sedsala 21’an e.”
