Stêrk Mihemed/Qamişlo
Rêveberiya Rêxistina Sara Nisriya Mehmûd diyar kir ku HTŞ’ê bi hişmendiya DAIŞ’ê jinên Berava Sûriyê dikujin û wiha got: “Pêwîste hêzên navneteweyî li hemberî komkujiyên li Berava Sûriyê tên kirin bêdeng nemînin.”
Piştî hilweşêna rêjîma Baas rewş li tevahî Sûriyê hat guhrtin, piştî hatina HTŞ’ê gefên qirkirin û komkujiyan li ser pêkhateyên Sûriyê zêde bû. Di 7’ê Adarê 2025’an cîhanê çavê xwe li ser qirkirina gelê elewî vekir. Çêkdarên HTŞ’ê li Berava Sûriyê bê serûber Elewî kuştin, ji xwe yê herî zêde para xwe ji kuştin, revandin û binpêkirinan girt, jinên Elewî bûn.
Derbarê revandina jinên Elewî li Berava Sûriyê rêvebera Rêxistina Sara a Bakur û Rojhilatê Sûriyê Nisriya Mehmûd ji rojnameya me re axivî.
‘Piştî hatina desthilata Şamê rewşa Berava Sûriyê aloztir bû’
Nisriye Mehmûd destnîşan kir ku piştî hatina desthilata Şamê rewşa Berava Sûriyê xerabtir bû û wiha got: “Weke
tê zanîn piştî hatina desthilata Şamê li ser desthilatdariyê rewşa Berava Sûriyê ber bi xerabûnê ve diçe, qetilkirin, komkujî û binpêkirin bi serê gelê Elewî de tê kirin. Jin tên revandin û qetilkirin, çekdar kiryarên xerab bi serê jin û zarokan de dikin. Deshilata Şamê li hemberî komkujiyên xwe bêdeng kir û hewil da komkujiyan veşêre. Li gorî hin agahiyan , hin jinên ku ji aliyê çekdarên HTŞ’ê hatin revandin niha ew jin tê kirîn û firotin, sûcên dijmirovî jî di derheqê wan de tê kirin.”
‘Qirkirina jin, qirkirrina civakê ye’
Nisriya diyar kir ku bêdengiya li hember vê komkujiyê bêwijdaniya hêzên cîhanî eşkere dike û wiha domand: “Bêdengî li hemberî van kiryarên xerab yê di derheqê jin û zarokan de tê meşandin, aloziyê û bêmafiyê diyar dike. Tecewîza ku li ser jin tê kirin ji aliyê desthilata Şamê ve, ji kiryar û terzê DAÎŞ’ê ne dûre, çavgirtina li hemberî van komkujiyan dagirkeriyê û neqebûlkirina mafê jinê diyar dike. Divê bêdengî li hember bêmafî û tecewîza ku li ser jinê tê kirin bê seknandin, ev kiryarên xerab yên li ser gelê Elewî tê kirin mafê mirovbûnê diyar nake, lê desthilatdarî û qirkirinê diyar dike.”
‘Pêwîst e hêzên navneteweyî komkujiyên li dijî jinan rawestînin’
Rêveberê Rêxistina Sara a Bakur û Rojhilatê Sûriyê Nisriya Mehmûd di dawiya axaftina xwe de bang li tevahî rêxistinên mafê mirovan kir û wiha got: “Banga me ji bo tevahî rêxistinan û dewletên navnetew ku bi gelê Elewî re alîkarbin û ev komkujiyên ku li ser wan tên kirin, werin bi dawî kirin. Hemû rêxistin û destgehên jinan divê xwedî li van jinan derkevin û ew çeteyên ku kiryarê xerab bi wan jina dikin werin cezakirin.”
