Lîloz Hisên/Qamişlo
Di dîroka 6’ê Nîsana 2025’an de, du jin ji eşîreya Bûbetûş li kantona Minbicê ku di bin desthilatdaiya çeteyên dagirkeriya Tirk de ne, di bin navê şerfê bi destê bav û bira hatin kuştin. Li gorî agahiyên li ser medyaya civakî ev sûc piştî revandina her du jinan ji hêla bazirganên Tirk û çeteyan pêk hat ku di madeyên hişbirê de kar dikin.
Sûceke din der heqê jinan de pêk tê, di bin navê şerefê û adetên paşverû ku jin dibe qurbanî û sûcdar nayên ceza kirin. Li kantona Minbicê û gundê Meran bi awayekî hovane du jin hatin kuştin û li ser medyaya civakî dîmenên wan hatin parvekirin. Ev sûc di nava rêzebûyerên kuştinên li herêmên di bin desthilatdariya çeteyên dewleta Tirk de pêk hat. Endama Mala Jinê ya Kombûna Zenobiya Semîra Muhemed Şahidê vî sûcê hovane şermezar kir û wiha got: “Kuştina her du jinên bêguneh bi awayekî hovane li kantona Minbicê nayê qebûl kirin. Piştî şoreşê jinê di her qadan de şer û berxwedan daye meşandin û di asta pêşengiyê de cihê xwe girtiye. Hişmendiya baviksalaraî heya roja îro tûndiya fîzîkî û derûnî li ser jinê pêk tîne bi taybet li herêmên di bin dagirkeriya Tirkiyê de, ku her dem ji fikir û azadiya jinê ditirse lewma û bi her awayî jinan dike hedef.”
‘Piştî têkbirina DAIŞ’ê em binpêkirina nema qebûl dikin’
Semîra Muhemed Şehada wiha domand: “Piştî berxwedan û têkoşîna bêhempa ku jinan pêk anîn li dijî çeteyên
DAIŞ’ê, em êdî careke din mîna ew fikrê reş û zordar vegere ku ji nû ve mafê jinan binpê bike qebûl nakin, piştî hemû qurbaniyên ku jinê pêşkêş kir ji bo xwe ji zilm û koletiyê xelas bike, em ê nehêlin cardin binpêkirinên dijmirovî der heqê jinan de pêk dihat; vegere.”
Semîra Muhemed Şehada wiha anî ziman: “Her roj li herêmên dagirkirî revandin û kuştin derheqê jinan de pêk tê zêde bibe, helbet ev bûyer çavkaniya xwe ji desthilata serdest digre. Ji ber nebûna cezayan rêjeya kuştin û kiryarên dijmirovahî li dijî jinê li bajaran zêde dibe û deriyê tundiyê bêhtir vedike. Banga me ji bo jinan ewe, ku bêdeng nemînin, herwiha li dijî van sûc û binpêkirinan bisekinin.”
Di dawî de Semîra Muhemed Şehada daxwaz ji raya giştî û rêxistinên mafên mirovan kir ku li hember van kiryar û sûcên dijmirovahî der heqê jinan de pêk tê bêdeng nemînin û wiha got: “Em daxwaz dikin ku li gorî qanûnên mirovî cezayên herî giran derheqê sûcdaran pêk bê.”
