Argêş Vîyan/ Qamişlo
Mîhrîcana Şehîd Yekta Herekol ya 7’emîn li Navenda Mihemed Şêxo ya Çand û Hunerê ya bajarê Qamişlo destpê kir. Di mihrîcana ku di 27’ê Adarê de dest pê kiribû û ji ber Cejna Remezanê û Akîto bo 5’ê Nîsanê hatibû paşxistin, ji tevahî Sûriye û beşên Kurdistanê 11 komên şanoyê beşdar bûn. Yekemîn pêşandana şanoyê di 5’ê Nîsanê de li ser dika Navenda Mihemed Şêxo hat pêşkêşkirin. Hêjayi bibîrxistinê ye ku 27’ê Adarê roja şahadeta şanoger Yekta Herekol (Erdogan Qehreman) e.
Komîteya Amadekar a Mihrîcanê îro di roja dawî de, saziyên ku piştgirî dane mihrêcanê, saziyên ewlekarî, xizmetguzarî û tenduristiyê, her wiha Nefel Prodîksiyon jî ji ber ku ji roja destpêkê ve çalakiyên mîhrêcan dişopand, hat xelat kirin.
Komîteyê her wiha malbata şanoger û welatparêzê kevnar Cûma Xelîl bi nasnav “Bavê Teyar” ku di 18’ê Çileyê de di encama êrişa balafirên dewleta Tirk a dagirker de şehîd bibû, xelat kir. Xelata Bavê Teyar ji aliyê hevserokê TEV-ÇAND ya Bakur û Rojhilatê Sûriyê Xelîl Tehlo li ser navê malbata Xelîl, hevjîna wî yadê Gulistan re hat dayin.
Ji ber asta hemû komên şanoyê nêzî hev bû, komîteyê biryar da ku her 11 komên şanoyê yên beşdarî festîvalê bûne xelat bike. Komên ku ji başûr û rojhilatê Kurdistanê ji ber ku piştî pêşkêşkirina şanoyên xwe vegeriyan welatên xwe, nekarîn xelatên xwe werbigirin. Komîteya Amadekar a mihrîcanê dê xelatên xwe radestî wan bike. Xelatên endamên komên Şano yên ji derve hatibûn ji aliyê Hevserokên Koma Şano ya Cizîrê Lorîn Derwêş, Kawa Fettah û Brahîm Evdo ve hatin dayin.
‘Mîhrîcana şehîd Yekta Herekol bingeha şanogeriya Kurdistanî ye’
Di axaftina destpekê ya bi dawîbûna mihrîcanê ji aliyê Rêveberê TEV-ÇAND ya Mezopotamya Ekîn Ronî axivî û
wiha got: “Em weke şanoger, hunermend û hemû endamên çand û hunerê deyndarê kesayetên weke Yekta Herekol û Bavê Teyarin. Weke Rêber Apo dibêjê “Huner hênaseya civakê ye” Ji ber wê her sal roja şehedeta şoreşger û şanogerê mezin Yekta Herekol ya 27’ê Adarê tê pêşkêşkirin. Weke TEV-ÇAND ya Mezopotamya, ev sal di aliyê rêxistinî, perwerde û hunerî de me gelek gavên nû avêtin. Ev cihê keyfxweşiyê û serbilindiyê ye. Di xebatên çand û hunerî de şer û têkoşînekî mezin tê meşandin. Dijmin ji bona ezezitî û kesayetên ku rastiyê dur ketine pêş bixin kar dikin, em jî ji bona jiyanek hevpar û komînal pêş bixin xebat dimeşînin. Li gor felsefeya Rêber Apo û paradîgmaya Netewa Demokratîk berhemên nû tên avakirin û pêş dikevin. Ji ber cejna Remezanê û cejna Ekîto ev sale mihrican 5 Nîsanê hat destpêkirin. Salên berê ji ber gef û êrîşên dewleta Tirk ya dagirker dihate asteng kirin, lê ev sal saya berxwedaniya Bavê Teyaran û têkoşîna Rêberê gelan Rêber Apo mihrîcana me bê pirsgrêk derbas bû û beşên Kurdistanê yên din jî tevlîbûn hatin kirin. Ev gav gavên nû bûn ji bona şoreşa Bakur û Rojhilatê Sûriyê. Ev sal jî weke salên din şanoyên pir zimanî çandî û hevpar derbas bû. Em dîsa silavên xwe yên germ ji bona Rêberê gelan Rêber Abdullah Ocalan, gel û şervanên Bendava Tişrînê û çiyayên azad berxwe didin rê dikin. Em dîsa li ser navê TEV-ÇAND ya Mezopotamya spasiya hemû xebatkar û şanogerên ku piştgiriya mihricanê kirin dikin”
Sazî û Kesayetên Mihracana Şehîd Yekta Herekol ya 7’emîn ya şano de hatin xelat kirin wiha bûn:
Li ser navê endam û reveberiya Navenda Çand û Hunerê ya Mihemed Şêxo: Ehmed Hemo
Li ser navê Hunergeha şehîd Welat: Roder Dimilî
Li ser navê Komîna Sînema û Film ya Rojava: Bêrîtan Hisên
Li ser navê endamê hêzên Ewlekariya Hundirîn ya Cizîre: Solîn Mistefa
Li ser navê Peymageha Bilind a Rojava ya bajarê Dêrîkê: Dorbîn Tobal Hemo û Mamoste Ciwan
Li ser navê Kompaniya Şemal: Delîl Ramo
Bi belavkirina xelatan û gerandina govendê mihrîcana şehîd Yekta Herekol ya 7’emîn bi dawî bû.
