Dîlan Mulhim\ Qamişlo
Rêvebera Mala Jin ya Bajarê Qamişlo Mebrûka Ibrahîm diyar kir ku di mihê de nêzî 50‘ î pirsgirêkên jinan tên Mala Jin ku piraniya wan pirsgikên jî pirsgirêkên malbatî ne û got: “Armanca me avakirina civak û malbateke dîmokratîk e”
Bi destpêkirina şoreşa Rojava re, bi armanca rêxistinkirin û parastina mafê jinê, Mala Jin hat avakirin û bû yek ji destkeftiyên şoreşê. Mala Jin bi domana demê re roj bi roj pêş ket û li tevahiya bajar û bajarokên Bakur û Rojhilatê Sûriyê şaxên wê hatin belavkirin. Di dema niha de mala jin hewil dide ji tevahî pirsgirêkên jin û civakê re bibe bersiv û mehane bi 10’an pirsgirêkên malbatan bi giştî û bi taybet yên jinan çareser dike.
Di derbarê kar û xebatên Mala Jin Rêvebera Mala jin ya Bajarê Qamişlo Mebrûka Ibrahîm ji Rojamameya me re axivî.
‘Mal Jin xwedî li jin û civakê derdikeve’
Mebrûka Ibrahîm anî ziman ku pirsgirkên civakî piraniya wan yên jin û mêran in û wiha got: “Di mehê de nêzî
50’î pirsgirêkî ji me re tên. Pirsgirêkên ku îro ji me re tên bi giştî pisgirêkên malbatî ne, yên wekî; zewaca temen biçûk ku di vê demê de kêm bûye, jinên ku ji ber işkence û tundiyê ji mal direvin. Herwiha hin caran ji aliyê kesên ne diyar ve li ser mediyayên civakî gef li jinan tê xwarin. Em ji aliyê xwe ve van jinan dikin cihê parastinê heta ku em pisgirêka wan çareser bikin. Çareskirina van pirsgirêkan mala jinê ji her alî ve dibe bersiv û pirsgirêkan çareser dike, kesên ku pirsgirkên wan di mala jin de çareser nebin em wan rêdikin dadgehan.”
‘Armanca Mala jin avakirina civakeke demokratîk e’
Mebrûka Ibrahîm da zanîn ku deriyê Mala Jin ji tevahiya civakê re vekirîye û wiha pê de çû: “Hin jin hene tên gazinên xwe dikin û hin jî ji tên ji bo ku karekî ji xwe re peyda bikin. Civak û jin, Mala Jinê ji xwe re riya çareseriyê dibînin. Herwiha armanca Mala Jinê civak, malbatek wekhevî û dîmokratî e. Dema ku em lihevkirin di navbera jin û mêr de çêdikin. Di heman demê de astengiyê ku em di karê xwe de dibîn ew jî pirsgirêkên jin û mêran in dema ku malbatên wan mudaxeleyê dikin. ”
Rêvebera Mala Jin a Bajarê Qamişlo Mebrûka Ibrahîm eşker kir ku pêwîst e jin xwe azad bike û wiha bi dawî kir: “Divê demê de pêwîst e jin hîn rêxistbûna xwe xurtir bike, herwiha dema ku jineke di malê de tudiyek hate li ser wê berê xwe dibin mala jin, ji ber ku mala jin xwedî lê derkeve. Di heman demê de em bi hêvî ne ku her jin riya xwe nasbikin, ji ber ku tundî li ser wan ne yê kirin.”
