Dilovan kêfo/Amûdê
Firoşkarên cil û şekiran yên bajarê Amûdê diyar kirin ku beriya cejna Remezanê tevgera bazaran pir baş bûye û gotin: “Tevgera welatiyan li bazarê li gorî salên bûrî pir cudatir e. Di vê mehê de û bi taybet beriya cejnê tevgera bazarê geş bûye.”
Li bazarên Bakur û Rojhilatê Sûriyê beriya cejna remezanê tevgereke zêde ya welatiyan heye. Bi taybet piştî daketina nirxên hin kelûpelan tevgera kirîn û firotinê li bazarê tê xuyakirin. Li bajarê Amûdê jî welatî ji bo amadekariyên cejnê berê xwe didin bazarê .
Derbarê hazirtiyên cejna Remezanê de, firoşkarên bajarê Amûdê ji rojnameya me re axivîn.
Firoşkarê çil û bergan yê bi navê Hesen Hilal wiha got: “Cejn ji bo me weke rojên normal derbas dibe, weke her carê derbas dibe , her wiha ji bo nirxên çil û bergan ji berê pir baştir e, di heman demê de liv û tevgera welatiyan li bazarê baş e. Em bi hêvîne ku rewşa gel a aborî hîn baştir bibe û em tev alîkariya hev bikin, cejanRemezanê li hemû gelan pîroz be.”
Di heman çarçoveyê de firoşkarê bi navê Ebdilbaqî Çeçan axivî û wiha got: “Bi giştî tevgera bazarê û milet pir baş e, li hemberî salên din nirxên kel û pelan baştir bûye. Kirîna şekirên cejnê jî ji salên borî zêdetir e. Hêviya min ew e ku her tim gelê me kêfxweş be, herwiha hêviya jiyaneke aramî aştî ku em jiyan bikin û di dawî de em cejna hemû gelê Kurd û hêzên xwe yên leşgerî pîroz dikin û hêviya me ewe ku serfirazî û aştî wê para gelê Kurd be.”
