Hêvî Keleş/ Qamişlo
Di bin dirûşmeya “Welatparêzê rast, hunermendekî wêrek” de, 7’emîn Festîvala Şehîd Yekta Herekol li Navenda Çand û Hunerê ya Mihemed Şêxo ya bajarê Qamişlo di 27’ê Adarê de wê bê lidarxistin.
Şehîd Yekta Herekol di sala 1968’an de li Hozatê ya Dêrsimê ji dayik bû, li Zanîngeha Gazî ya Enqereyê xwend. Piştre tevlî Tevgera Azadiya Kurdistanê bû û li Yewnanîstan, Romanya, Rûsya, Wargeha Mexmûrê, Rojavayê Kurdistanê û Helebê nivîsandina şano, derhênerî û şanogerî kir. Yekta Herekol di 27’ê Adara 2004’an de li Helebê di çalakiya fedaî de şehîd bû.
Derbarê 7’emîn festîvala şanoyê ya şehîd Yekta û amadekariyên wê, Rêvebera Komîna Şano ya Bakur û Rojhilatê Sûriyê Rûmet Beko ji Rojnameya me re axivî.
Rûmet Beko di destpêka axaftina xwe de wiha got: “Ev festevîla ku em ê li dar bixin, em ê ji giyanê şehîd Cuma Xelîl û şehîd Yekta Herekol re li dar bixin. Di bin dirûşmeya “Welaparêzê rast, Hunermendekî wêrek e”. Wê Festîval ji 27’Adarê dest pê bike û heta 11’Nîsanê bi dawî bibe. Di vê festîvalê de wê mêvanên me ji derveyî herêmê werin, me hewil daye ku ji her çar parçeyên Kurdistanê mêvanantevlî bikin. Ji Rojhilatê Kurdistanê wê komek hazir bibe. Ji Başûrê Kurdistanê du kom, yek ji Silêmaniyê û yek ji Kerkokê wê beşdar bibin. Herwiha komîteyek ji Silêmaniyê wê derbas bibe. Di heman demê de di vê Festîvalê de şanoyên ku di pêşbirkê de ne tenê wê yên Monodarama bin.”
Rêvebera Komîna Şano ya Bakur û Rojhilatê Sûriyê Rûmet Beko axaftina xwe wiha qedand: “Şanoyên ku wê bên pêşkêş kirin pênc şano ne, ew jî ji Qamişlo ne, şanoyên ku wê ji derveyî Qamişlo derbas bibin wê weke mêvan beşdar bibin. Hêjayê gontinê ye ku wê komek ji Siweyda û komek ji Heleb jî tevlî Festîvalê bibin. Di heman demê de wê li gel şanoyan simîner jî hebin û belgefilmek li ser jiyana şehîd Cuma tê çêkirin û di festîvalê de wê bê pêşkêş kirin. 3’ê simîner tên hazirkirin, ev simîner wê li ser hunera şano bin.”
