Hemza Sêvo/ Qamişlo
Desteya Çandê û Dîwana Wêje, 6 dîwanên ku di pêşbirka 7’emîn a Mihrîcana Osman Sebrî ya Wêjeyê de xelat wergirtibûn, bi ahengekê û bi tevlîbûna gelek rewşenbîran li Baxçeyê Xwendinê yê Qamişlo îmze kir.
Di 2’ê Mijdara sala 2023’an de Mihrîcana Osman Sebrî ya Wêjeyê bi beşdarbûna gelek helbestvanên Rojava, Sûriyê û kurdên li derve dest pê kir. Di encamê de 6 helbestvanî xelat wergirtin û berhemên wan hatin çapkirin, îro jî her 6 dîwan bi ahengekê hatin îmzekirin.
Dîwanên ku îmze bûn jî ev in: Dîwana ‘Çil û Çar Kêlî’ ya helbestvan Mîdiya Berekat, bi kurdî bû, dîwana ‘Sebra Gamasî’ ya Kamiran Hedilî, bi zimanê kurdî bû, Dîwana ‘Pêlname’ ya helbestvan Ebûd Mexso, bi zimanê kurdî bû. Dîwana Cîdariyat Elmaa Welremil a Mehmûd Ebdo, bi zimanê erebî bû, dîwana ‘Ercûkim Qebl En Emût’ a helbestvan Diyaa Iskender, bi zimanê erebî bû û dîwana ‘Ehras Lîdefair Jîna’ ya Ebdilbarî Ehmê bi zimanê erebî bû.
Ev berhem ji hêla Desteya Çandê ya kantona Cizîrê û Dîwana Wêje ya Bakur û Rojhilatê Sûriyê ve îmze bûn, herwih gelek rewşenbîr, nivîskar û helbestvan amade bûn.
Berî ku ahenga îmzekirinê dest pê bike, hemû kesên amade tevlî xuleka bêdengiyê bûn.
Piştî wê bi navê Desteya Çandê Ebdilmecîd Xelef derbarê lidarixstina ahenga îmzekirinê wiha got: “Em spasiya hemû endamên Dîwana Wêjeyê û Desteya Çandê dikin ku ev saleke hewil didin ku van berheman çap bikin. Herwiha helbestvanên ku di pêşbirka mihrîcanê de bi ser ketin, kedeke mezin dan, em wan pîroz dikin û hêvî dikin ku her û her ew berhemdar bin.”
Piştre bi navê Dîwana Wêjeyê ya Bakur û Rojhilatê Sûriyê, Narîman Evdikê wiha anî ser ziman: “Wekî em dizanin berê Mihrîcana Apê Osman salane bû, lê bû her du salan salekê li dar dileve. Salekê mihrîcan li dar dikeve û sala
din jî pirtûk tên çapkirin. Lewma jî me bi navê Apê Osman Sebrî pirtûkxanek vekir ji bo berhemên ku ji mihrîcanê derketine, kom bibin û pirtûkxaneya kurdî dewlemend bibe. Herwiha me xwest ku hemû cureyên wêjeyî tevlî mihrîcanê bikin. Ji ber vê yekê jî wê pêşbirka îsal wê derbarê deqên şanoyê be, em ê di xemeke nêz de şertûmercên pêşbirkê ragihînin, pêwîst e şanonivîsên me jê re amade bin.”
Piştî wê jî hunermend Behaa Şêxo çend stran gotin.
Herwiha helbestvan Diyaa Iskender derbarê naveroka pirtûka xwe de wiha rave kir: “Dîwana min a bi navê ‘Ercûkim Qebl En Emût’ ango bi hêvî me sê hêviyên pêk werin berî ku ez bimirim. Hêviya min a yekem ew bû ku
ez bi çavê xwe hilweşandina rêjîma Beisê bibînim, ev hêvî pêk hat, lê rêjîmeke din a xirab kete cihê wê. Hêviya din pêkanîna xewn û xeyalên kurdan ji bo doza wan, banga Rêber Apo ji bo gelê kurd û hemû pirsgirêkên Tirkiyê û Sûriyê riya çareseriyê ye, ji bo wê jî dixwazim rêbertî azad bibe. Herwiha xewn û hêviya din ku doza gelê Filestînê çareser bibe.”
Herî dawî dîwan ji hêla helbestvanan ve hatin îmzekirin û li hemû kesên amade belav bûn.
